Partîya Çep a Keske taxa Bahçelîevlerî ya Êlihî de buroyê weçînayîşî akerd. Hemsereka HDPyî Pervîne Buldan, aktîvîstê TJA, Mayê Haştîye, Wekîla HDPyî ya Êlihî Feleknase Uca, Vervatoxa Meclîsê Cinîyan ê HDPyî Ayşe Acar Başaran, Wekîlê HDPyî yê Amedî Îmam Taşçier û temsîlkarê xeylêk dezgeh û rêxistinan tewrê akerdişî bîyî. Akerdişê buroyî dima vurîya mîtîngî.

Hemsereka HDPyî Pervîne Buldan mîtîng de qisey kerd. Buldane qiseykerdişê xo de pare kerd ke ê hêvî kenê ke şar nê buroyan pirr bikero û vat: ''Ma pê bawer ê ke şarê Êlihî weçînayîşan de 5 de 5 bikero û 5 wekîlanê Partîya Çep a Keske bişawo Meclîsî. Erdlerzê Mereşî de na dewlete şar bêwayîr verda. Kesê ke merdimî muhtacê nanî kerdê, 14ê gulane de dersê xo do bigêrê.''

Buldane vist vîrî ke ê do nameyê Partîya Çep a Keske ser o tewrê weçînayîşan bibê û vat: ''Ma şarê xo ra bawer ê. Eke dek û dolabê înan est ê, hemleyê ma zî est ê. Şarê ma est o.''

Qiseykerdişan ra dima buroyê weçînayîşî bi coşêlê pîlî ame akerdene. Akerdişê buroyî ra dima girseyî sloganî eştî û govende girewte.