Hemserekê Pêroyî ya HDPyî Pervîne Buldan, Vervatoxa Partîye Ebru Gunay û Vervatoxa Meclîsê Cinîyan Ayşe Acar Başaran, parlamenter û îdarekanê partîye ra heyetêkê HDPyî Bazarcix de tewrê xebatanê hetkarî bîyî ke merkezê hetkarî de qeyûm amebi cakerdenene. Bado ke hetkarî ameye astengkerdene, Buldane bi xo ameye Bazarcix û pîya bi heyetî hetkarî vila kerde.

Buldane Bazarcixi rê serweşîye waşte û vat: ''Ma eşkenê bi paştîdayîşî birînanê xo bipêşê.  Ma ewro kampanyayêka newî daye destpêkerdene; Ma mîyanê paştîdayîşî de yê. Roja verên a bunlerzî ra ma sey HDPyî pîya bi heme dezgehanê xo, parlamenteranê xo, meclîsanê cinî û ciwanan, embazanê xo yê zerrîwazan des bajaranê bunlerzî de paştî danê şarê xo. Ma cehd kerd ke hetkarî biresnê mexdûranê bunlerzî û birînanê înan pîya bipêşê. No paştîdayîş, pîyayîye û yewîye hema dewam keno.

Bazarcix de hetê şarê Bazarcixî, partîya ma, dezgehanê komelê sîvîlî pîya embarêk de malzemeyî kom kerdêne ke dima dewan de, kam ke hewceyê hetkarî yo, înan rê vila bikerê. No paştîdayîş bi, yew seferberîye bî. Pîya piştişê birînan bi. Vizêr bi talîmatê ke corî ra girewto, qeymaqemî no embar xesp kerd ke verê hetkarî bigêrê. Seba ke verê paştîdayîşî bigêrê ûca xesp kerd û tede qeyûm cakerd.

Xora zîhnîyetê qeyûmî nê welatî de çîyo newe nîyo.  Bado ke îqtîdarî şaredarîyanê me de qeyûm cakerd, hinî keno ke her ca de vila bikero. Ewro, roja ke hewceyê piştişê birînan est o, bînaya hetkarî de qeyûm cakerd. No semedê Tirkîya tabloyê şermî yo. No zîhnîyet do çirey mero qebulkerdene. Bedelê ci beno wa bibo, ma do hetkarî biresnê şarê xo. Senî ke ewro ma  pîya bi tiran ameyî tîya, ma do ewro ra tepîya zî wina bikerê.

Eke yewna cayê dinya de na felakete bibîyênî, îdarekaranê welatî do îstîfa bikerdêne. Seba ke nêeşkayî welatî îdare bikerî û bîyî sebebê mergê bi hezaran kesan, îstîfa kerdêne. La nînan îstîfa caverde, verê hetkarî paştîdayîşî girewt. Paştîdayîş zorê înan şi. Xora înan de rîyo ke îstîfa bikero çîn o, wîjdan çîn o. Şar xeymê înan de nîyo, têna derdê înan ameyoxê înan bi xo yo. Ma tîya ra veng danê: Serekkomar û wezîrî pêro wa îstîfa bikerê. Xora do vîjnayîş de şar do înan bişawo.

Ma do bi îmkananê xo yê kêman, pîya bi 6 şaredarîyan ke destê ma de yê, destê ma ra çi bêro, ma do bikerê. Eke şaredarîyê ma nêameyêne destsernayene û hemşaredarê ma zîndan nêbîyênî, ewro şarê ma wina zaf tengayî nêantêne.''