HDPyî çarçeweya ''Kampanyaya Pawitişî'' de Dîlok de têhetameyîşê şarî organîze kerd. Têhetameyîşo ke verê rêxitina HDPyî ya qezaya Şehîtkamîlî de ame kerdene Hemsereka Pêroyî ya HDPyî Pervîne Buldan, Hemserekê Pêroyî yê DBPyî Keskîn Bayindir û wekîlê HDPyî tewrê ci bîyî.

Buldane bale ante tengayîya ke şarê Dîlokî anceno ser û vat: ''Ma zanê şarê ma tîya senî tengayîye anceno. Îqtîdar pê sîyasetî nêvejîyeno verê ma. Ê pê xesp, zulum, destbendkerdiş û tepiştişî vejîyenê verê ma. Têna nê bajarî de na bîna de bi seyan embazê ma bîlasebeb destbend kerdî  û tepiştî.  Nika 55 embazê bîlasebeb zîndan de yê. Înan vat qey pê destbendkerdişî eşkenê berê HDPyî mor bikerê. HDP wina yew partîye nêya. Berê ci nêno qefilnayene. Ma yew şinê hezar yenê. Ma nê berî nêdanê qefilnayene. HDP îradeyê nê welatî û hêvîya şaran o. Êyê ke vanê qey ê eşkenê HDPyî biqefilnê xeletîyenê. Şarê Tirkîya û kurdî do çirey destûrê qefilnayîşê HDPyî nêdê.

Nika seba ke vîjnayîş beno nêzdî îqtîdarî çim verdayo rayanê kurdan. Nika ra dest pêkerd. Serekkomarê nê welatî di rojî verê cu şi Amed û reyna îlan kerd ke o kurdan ra raye wazeno. Êyê ke kurdan rê zulm kenê, îradeyê înan çîn hesibnenê, kurdan rê heqeret kenê, her roje ci rê dewa akenê, heqê ci yê vîjnayîşî xesp kenê, wekîl û hemşaredaranê ci heps kenê wa nayî bizanê ke ne heqê înan ne zî hadê înan esto ke kurdan ra reyan biwazê. Hem vera kurdan neheqîya ke nêkerda nêmenda hem zî rayanê ci wazeno. De weta şo uca ra. Kurdî zuranê şima ra bîyî mird. Kurdî her wext wayîrê îradeyê xo vejîyenê.

Nê welatî de kam ke wazenê bibo îqtîdar ganî meseleya kurdî ya meseleya  tewr pîle yê welatî ya, çareser bikero. Heta ke na mesela nêro çareserkerdene demokrasî do nêro welat. Wa çew/e mevajo qey ey wina rehat reyanê kurdan genê. Kurdî mecbûr û mehkûmê kesî/e nêyê. Eke şima wazenê welat de demokrasî, azadîyeyî, edalet û heq huqûq aver şirê, şima ganî HDP û kurdan esas bîgirê. Vîjnayîşê Îstanbul, Anqara, Îzmîr, Adana, Mersin û Antalya de yewîya hêzê demokratîkî ke ma paştdî da ci muhîm bî. La ewro ra tepîya wa ma ra çîyo winayên nêro pawitene. Wa her kes bizano ke ma nê tewirî do reyna memojnê ra. Rayîrê ma zehmet o la ma do pêro pîya têkoşîn bikerê û ser bikewê.''