Partîya Çep a Keske (YSP) Şemzînan, Îstanbul û Îzmîr de bi coşî, govend û sloganan buroyê weçînayîşî akerdî. Qiseykerdişan de ame vatene ke faşîzmê îqtîdarê AKP-MHPyî 14ê gulane de do bêro binvistene.

Rêxistina YSPyî ya Colemêrgî qezaya Şemzînanî de bi coşî buroyê xo yo verên akerd. Wekîlê HDPyî Feleknase Uca, Sezaî Temellî, Saîd Dede, aktîvîstê TJA, endam û îdarekarê YSPyî yê Colemêrgî tewrê akerdişî bîyî. Saîd Dedeyî, Sezaî Temellî û Feleknase Uca bernameyê akerdişî de qisey kerd û pare kerd ke  ê do hesabê neheqî û zulman weçînayîşan de bipersê.

Rêxistina YSPyî ya Îstanbulî taxa Koxamuştafa Paşayî ya qezaya Fatîhî de buro akerd. Hemsereka HDPyî Pervîne Buldan, Endama Heyetê Rayberdişê Merkezî ya YSPyî Çîgdeme Ozbaş û xeylêk kesî tewrê bernameyê akerdişî bîyî. Buroyî ser de ''Buroyê Weçînayîşî yê Aram Tîgranî'' nusîya. Çîgdeme Ozbaş û Pervîne Buldan akerdişê buroyî de da zanayene ke kurdî, tirkî, elewîyî û şarê bînî binê YSPyî de yenê pêser û ê soz danê ke 14ê gulane de nê îqtîdarî bişawê.

Rêxistina YSPyî ya Îzmîrî qezayanê Narlidere û Bayrakliyî yê Îzmîrî de buroyê xo akerdî. Îdarekarê YSP û HDPyî û xeylêk kesî tewrê bernameyê akerdişî bîyî. Hêverî Narlidere de bi sloganê ''Denîze Poyraz bêmerg a'' buro ame akerdene. Dadîya Denîze Poyraz Fehîme Poyraz tîya de qisey kerd û waşt ke rayê şarî do bibê wesîleya akerdişê beranê zîndanan. Dima taxa Yamanlarî de zî buro ame akerdene.