Endama Konseya Rayberdişî ya KCKyî Emîne Kara (Evîne Goyî), hunermend Mîr Perwer (Mehmet Şîrîn Aydin) û welatperwer Abdurrahman Kizil 23yê kanûne de paytextê Fransa Paris de ameybî qetilkerdene. Cenazayê hîrê şehîdan erşawîyayî Kurdîstanî.

Cenazaya Mîr Perwerî Meydanê Teyarayan ê Mûşî de hetê Hemserekê Pêroyî yê KCDyî Berdan Ozturk, wekîlanê HDPyî û keyeyê ci ra ameye girewtene û ame waştene ke pê konveyê wesayîtan bêro berdene dewa Ewranî. La polîsan cenaza remna û yewna rayîrî ra berde dewe û destur nêda şar bikewo dewe.

Wekîla HDPyî Gulîstane Kiliç Koçyigîta ke wesayîtê cenaza teqîpkerdêne dekewtişê dewe de hetê leşkeran ra ameye vindarnayene. Koçyîgîte wesayîtî ra ameye war û peye resaye dewe la leşkera reyna a vindarnaye û nêverda şiro dewe.

Cenazaya Perwerî binê ablûqaya polîsan û leşkeran de pê tewrbîyayîşê babî û wayûbirayanê ci ameye definkerdene.

Hetê bînî ra bi seyan kesê ke yewna rayîrê dewe de ameyî têhet kerd ke peyê biresê dewe û tîya eşkerayîye çapemenîye bikerê. Polîsan û leşkeran pê bombayanê gazî û guleyanê plastîkan hêrişê şarî kerd. Şarî zî pê kuçan cewabê polîsan da.  Netîceya hêrişî de xeylêk kesî binê tesîrê gazî de mendî û bi desan kesî zî ameyî destbendkerdene.