Kadikoyê Îstanbulî de hetê Platformê Cinîyan ê 8ê Adare ra bi şîarê hesabo ke ma bipersê  est o, hêzê ma est o ke ma neweyî ronê têhetameyîşê cinîyan ame organîzekerdene.

Verê têhetameyîşî polîsan pêro kuçeyê Kadikoyî girewtî. Rixmê heme astenkerdişan cinîyan bi hewayêkê qerardarî verê xo da warê çalakîye. Dayîkanê Haştîye sefanê verênan de cayê xo girewt û seba ke hukmatî şar binê rijnayîşan de mergî rê caverda sloganê Dewleta kiştoxe do hesab bido û hukmat îstîfa ameyî eştene.

Cinîyan bi slogana “ Jin jiyan azadî” xoverdayîşê cinîyan ê Rojhelatê Kurdîstanî û Îranî silam kerd û semedê xurtkerdişê têkoşînî veng da. Cinîyan vat ê vera şîdetê camerd û dewlete, qirkerdişê cinîyan, feqîrîye, şer, sîyasetê rant û talanî hêrsbîyaye yê û bi serewdaritişî waran de yê.

Eşkerayîye de wina ame vatene: ''Înanê ke 8ê Adara 1857 New York de cinîyê karkerdî fabrîka de vêşnayî û înanê ke ewro şar binê rijnayîşê erdlerzî de mergî rê caverda, semedê xelisnayîşê kasayanê pereyî yê bankayan vînç şawitî, keda şarî ra bi diznayîşî xemî rotî, ferqê înan yewbînan ra çîn o. Ma ewro pê hêrs û serederaritişî tîya de yê. Ma do pê paştîdayîşî bajaranê xo newe ra ronê. Ma cinîyî do ameyoxê azadî ronê, neweyî ronê. Ma do cuya xo bipawê Wa biciwîyo paştîdayîşê cinîyan.''