Semedê azadîya Rayberê Şarê Kurdî Abdullah Ocalanî Cenevreya Swîsre ra enternasyonalîstan 6ê sibate de û Heilboronnê Almanya ra zî ciwananê kurdan 5ê sibate de Rayraşîyayîşo Derg dabi destpêkerdene. Seba ke rîyê erdlerzî ra rayraşîyayîşê Strasbourgî peyde ame eştene, ciwanan rayraşîyayîşê xo ewro qedîna.

Ciwanî ewro Freiburgê Almanya de resayê pê, pîya rayraşîyayîşêko hempar kerd û dima eşkerayîya hempare daye. Eşkerayîye de ame vatene ke rayraşîyayîşo merkezî yê Strasbourgî ke her serre vera Komployê 15ê Sibate yeno kerdene, rîyê edrlerzî ra ameyo peydeeştene û ame vengdayene ke semedê azadîya Abdullah Ocalanî û paştîdayîşê mexdûranê erdlerzî wa her kes bi ruhê seferberîye bigurîyo.