Hemserekê Kongreya Komelê Demokratîkî (KCD) û Namzetê Amedî yê Partîya Çep a Keske Berdan Ozturkî derheqê prosesê weçînayîşan de ANFyî rê qisey kerd.

Ozturkî vist vîrî ke AKP-MHP netîceya têkoşîn û xoverdayîşê kurdan de hînî verê rijîyayîşî de yo û vat: ''AKPyî îqtîdarê xo yê 20 serrî de welat mîyanê krîzan de verda. Weçînayîşê 14ê gulane krîtîk ê çunke no seba ke ma îqtîdarî bixelisê firsendêk o. Nê weçînayîşî şarê ma rê yew hêvî ya. Eke AKP-MHP weçînayîşan de ser bikewo krîzî do bibê xorinêr û şîdet vila bibo. La eke AKP-MHP bin bikewo haştîye û azadîyê komelkîyî do pîl bibê. 

Şarê ma yê kurdî heta nika bi zorî û zehmetîyî xeylêk çîyî vistî destî, bendê weçînayîşî yê se ra 10 derbaz kerd. Înan hem bi meseleya bendî hem zî bi dewaya qefilnayîşî kerd ke vengê kurdan bibirnê. La eke ma bi xurtî bikewê Meclîsî, sîyasetê çareserîye û haştîye yanî sîyasetê rayîrê hîrêyînî do bibo dîyarker. 

Birêz Abdullah Ocalanî tim haştîye rê destek da û seba ney xîret kerd. La îqtîdarî û dewlete tim hetê şîdet û şerî de bîyî. AKP-MHPyî pê hêrişê vera Rojawanî û tecrîdî verê haştîye girewt. Muxalafet zî bi bêvengîya xo paştî daye ney. Seba ke çareserîye bêra caardene ganî mezgê înkar û îmha bêro vurnayene. Seba çareserîye adres Birêz Abdullah Ocalan o. La o zî binê tecrîdî de yo. Eke îqtîdar bivurîyo ganî rayîrê muzakere û dîyalogan zî bêrê akerdene. Nêbo meseleyî do bibê xorinêr. Coka muhîm o ke verê çareserîye bêro akerdene û adresê çareserîye zî Ocalan o.

Şarê Amedî seba ke mîsyonê xo yê tarîxîyî bîyaro ca pabeyê 14ê gulane yo. Şarê Amedî do vera qeyûm, teda, şîdet û qedexeyan cewabê xo 14ê gulane de bido. Ma a roje do hesab bidê. Ma hedef kenê ke Amed de 12 wekîlîyan zî bigêrê. Ganî heta weçînayîşî her ca de ma xo rêxistin bikerê. Ma bi hêzê şarê xo hêvî kenê ke weçînayîşan de ser bikewê.''