Malîk Daylanî dîyar kerd ke o zî awanîyêka 7 qatî de binê xirbe de mendo û sey heme kesan o zî paweyê hetkarîya dewlete bîyo la a hetkarî qet nêameya. Bi xebata zerrîwazan û merdimanê ey binê xirbe ra vejîyayo. Dalyanî ANFyî rê behsê ê rojanê binê xirbe kerdî.

 ‘Ma erdlerzî ra nêmerdî, ez fikirîyayêne ke ma do serdan ver bimirê’

Dalyanî da zanayene ke cinî û lajê ey bi çend sanîyeyan, verê ke bina birijîya xo eştê teber û vat, ‘‘Wextê erdlerzî de cinî û lajê mi vejîyayê teber ez seba ke lajê xo yê bînî bigîra şîya oda la ca de ceyran şî û bîna rijîya. Mi sey refleksî xo eşt erd û destanê da sereyê xo ser. Telefon tonika mi de bî. Mi vet û roşin kerd ke linga mi ra gonî yena û sêneyê mi dejayêne. Mi solê lajê xo da birîna linga xo ser û gonî vindarna. Ez derûrdorî ra ewnîyaya ke kolonî kewtê mi ser. Serê mi ra cinî û camêrdêk zî est bî ê zî mexsûr mendbî, vengê înan ameyêne mi. Bi taybetî şewe zaf serd bî. Ma erdlerzî ra nêmerdê la ez fikirîyayêne ke ma do serdan ver bimirê. Çunke qet hetkarî ma nêresayêne. Nas û merdimanê ma û zerrîwazan bi destanê xo, ma bi îmkananê xo binê xirbe ra vetî’’

‘Hukmatî çira ma terkê mergî kerdî, seba ke na taxa elewîyan a?’

Dalyanî dîyar kerd ke bi kepçeyan dekewtişê xirban qet nêyeno qebul kerdene û vat, ‘‘Hukmat sûçdar o û peygoş kerd. Ti 24 saetî de nêrê ma do vajê temam herême hîra ya encax eşkîyayê. La 2 rojî heta bi rojan ti kamca ra yî? Ti çira ê însanan terkê mergî kenî? Seba ke na Armûtlu taxa elewîyan a? Eke hukmat nê rojanê zehmetîyan de çin o, do key est bibo?’’