Delegasyonê Vera Tecrîdî yê Mîyanneteweyî yo ke 7 welatan ra 36 huqûqnas, rojnameger û akademîsyenî tede ca genê,  Amed û Anqara de derheqê tecrîdê serê Rayberê Şarê Kurdî Abdullah Ocalanî û tepişteyanê bînan Îmraliyî de pêvînayîş kerd.

12 endamanê delegasyonî Amed de merdimanê Abdullah Ocalan, Veysî Aktaş û Omer Hayrî Konarî yê ke Îmrali de binê tecrîdê giranî de yê, reyde pêvînayîş kerd. Delegasyon hetê avûkatanê Buroyê Huqûqî yê Asrinî û  Komeleya Huqûqnasan a seba Azadîye (OHD) ra ame verwazîkerdene. Heyetî birayê Abdullah  Ocalanî, Mehmet Ocalan, Wekîlê HDPyî yê Riha Omer Ocalan, dayîka Veysî Aktaşî, Faîke Aktaş û birayê Omer Hayrî Konarî, Alî Konarî reyde pêvînayîş kerd.

Badê pêvînayîşî bi nameyê keyeyan Omer Ocalanî qisey kerd: ''Ma pêvînayîş de qala bêhuqûqîya Îmraliyî kerde. Îmrali de huqûq yeno bipaykerdene. Ma zanê ke Kurdîstan û Tirkîya binê tecrîdî de yê. Ma veng danê rayapêroyîya mîyanneteweyî ke wa vera na bêhuqûqîye bêveng memano. No zîyaret semedê ma bimana yo.  Ma wazenê ke wa avûkatî cade Îmrali de pêvînayîş bikerê. No heqê ma yo fermî yo. Meseleya kurdan meseleyêka giran a. Ma do dormeyê paradîgmaya Birêz Ocalanî de têkoşînê xo bidomnê.  Tewr vernî de ganî tecrîd cade bêro wedaritene.''

Mehmet Ocalanî zî  waşt ke bêrê Îmraliyî cade bêrê akerdene. Dayîke Faîke Aktaş zî vat ê têna haştîye wazenê.

Heyet do ewro Dayîkanê Haştîye û  komeleya paştdayîşê keyeyanê tepişteyan Med Tuhad- Fedî zîyaret bikero.

Anqara de zî heyetê Delegasyonê Vera Tecrîdî yê Mîyanneteweyî Yewîya Tabîban a Tirkîya (TTB) û Weqfa Heqanê Merdiman a Tirkîya (TÎHV) reyde pêvînayîş kerd. Sereka Konseya Merkezê TTByî Şebneme Korur Fîncaci online tewrê kombîyayîşî bîye. Pêvînayîş de bale ameye antene tecrîdê giranî û rewşa tepişteyanê nêweşan ser.