Deleqasyonê Vera Tecrîdî yê Mîyanneteweyî badê pêvînayîşanê ke Îstanbul, Amed de kerdî agera û Roma de pîya bi Fedarasyonê Çapemenîye yê Îtalya û Boruyê Enformasyonî yê Kurdîstanî eşkerayîye daye.

Bado ke selahîyetdaranê Buroyê Enfermasyonî yê Kurdîstanî derheqê Rayberê Şarê Kurdî û hîrê tepişteyanê bînan ê ke Îmrali de binê tecrîdê giranî de zanayîş da, endamanê delegasyonî fîkrê xo ardî ziwan.

Merkezê Cigêrayîşê Huqûqê Mîyanneteweyî yê CRED-GIGIyî ra Herta Manenti ard ziwan ke hetê sîstemê huqûqî ra  problemo pîl oyo ke hukm hukmatî ra xoser nîyo. Manenetî vat: '' Ma qesawt kenê ke modelê Îmraliyî heme zîndananê Tirkîya vila bo.''

Endama Heyetê Rayberdişî yê Potere al Popoloyî Francesca Trasatti Avvocatessa zî vist vîrî ke goreyê huqûqê mîyanneteweyî 15 rojan ra zafêr tecrîd qedexe yo û vat: ''Goreyê nê dewleta tirke 24 serrî yo madeyê 3. yê Pêkerdişê Heqanê Merdiman ê Ewropa binpay kena.''

Merkezê Cigêrayîşê Huqûqê Mîyanneteweyî yê CRED-GIGIyî ra Michela Arricale zî  ard ziwan ke heqê CPTyî est o ke rixmê dewleta tirke raporê xo biweşano vat: '2CPT ganî cade raporê xo eşkera bikero.''

Sekreterê Komeleya Partîzanan a Mîyanneteweyî ya  Îtalya Fabrizio De Sanctisî veng da ke wa vera tecrîdî û şuxulnayîşê çekanê kîmyewîyan ê Tirîya her kes vengê xo berz bikero.

Avûkatê Projeyê Heqanê Meriman Cosimo Alvaro bale ante caardişanê dewleta tirke yê vera keyeyanê tepişteyanê sîyasîyan û şeyîdan ser û qala  cenazayanê ke pê qutîyan û tewreyan teslîmê merdimanê ci bîyî kerde.

Temsîlkarê Yewîya Avûkatanê Demokratîkan Cesare Antetomasoyî zî vat seba ke CPT raporê eşkera bikero û Konseya Ewropa heqanê tepişteyan rê hurmet bikero ganî kampanyayêka mîyannetweyî bêro destpêkerdene.

Sekreterê Neteweyî yê Partîya Komînîste ya Newera Pêserardişî Maurizio Acerboyî zî ard ziwan ke seba ke hêzê Ewropa kerdişanê Erdoganî nêvînayîşî ra yenê, Tirkîya bi hewayêkê sîstematîkî heqanê merdiman binpay kena.

Delegasyonî badê kombîyayîşî veng da ke sere de Roma  wa her kes tewrê rayraşîyayîşê 11ê sibate yê Strasbourgî bibo ke semedê Rayberê Şarê Kurdî Abdullah Ocalanî do bêro kerdene.