Tepîşteyo nêweş Seyfettîn Demhat ke Zîndanê Qefilnayeyî yê bi Ewlekarîya Berze yê Wanî de yeno tepîştene, nêno tedawîkerdene. Waya Demhatî Şengule Marti vat, ‘‘Gere serrêke derzîne bêro pirodayene. Seba ke derzîne vay a, dewlete nêgêna.’’

Seyfettîn Demhat serra 2015î de ame tepîştene û 27 serrî ceza ameye dayene. Demhatî de nêweşîya Familial Mediterranean Fever (FMF), est a. Nêweşîya ey genetîk a û xo tekrar kena. Ganê ey recifêno, çermê pîzeyê ey îltîhap gêno û ganê ey dejeno. No 3-4 çar rojî dewam keno. Demhat dermanê Koşîsîn gêno la no derman zî ey rehet nêkeno tena dejanê ey biney kêmî keno û nêverdano ke organê bînî zirar bigîrê.

Demhat bi serran o ke vera na nêweşî xover dano. Dermanî êdî tesîr nêkenê. Doktorî ey rê derzînî nuştî û gere her roje derzînêke bêro pirodayene. Eke nê derzînî nêrê pirodayene, do demekî ra dima organê ey ê zereyî îflas bikerê. Dewlete heqê tedawîyê ey nêdana.

Waya ey Şendule vat, ‘‘Demhatî ra vejîyayo ke gere heqê tedawîyî keyeyê to bido, îmkanê ma çin ê ke ma to tedawî bikerê. Halê ey ver bi nebaşîye şino. Nika cuya ey rîsk de ya. Ma wazenê ke bi lez û bez bêro veradayene.’’