Partîya Çep a Keske vizêr Dêrsim de buroyê vîjnayîşî akerd. Dêrsimijê ke tewrê akerdişî bîyî govende girewte û mesajê xurtkerdişê têkoşînî dayî.

Namzeda Partîya Çep a Keske ya Xarpêtî Nurşate Yeşîl vat êyê ke azadî û haştîye wazenê do 15ê gulane de bi serkewtişê girdi hîşyar bê.

Namzeda Partîya Çep a Keske ya Dêrsimî Aytene Kordu zî vat: "Ma bi hêzê 
'Jin, jiyan, azadî' kewtî warî. Na hinda yew slogane nîya.  ‘Jin, jiyan, azadî’ yew tewirê cuye yo ke bi keda têkoşînî û xoverdayîşê cinîyan gave bi gave ame nûntene û heta ewro ame. Coka ma sey cinîyan do parlamento de temsîlîyetê tewr girdi bikerê. Ma do pêro pîya ser bikewê. ”

Hetê bînî ra cinîyê ke tewrê akerdişê buroyî bîyî ard ziwan ke Partîya Çep a Keske semedê înan bîya hêvî û vat ê do sey cinîyan nê sîstemî bibedilnê.

Cinîyan ra Pakîze Aydin vist vîrî ke cinîyî bi serran o vera îqtîdarê AKPyî xover danê û vat: “Semedê rijnayîşê rejîmê yewmerdimî ma do rayanê xo bidê Partîya Çep a Keske.” 

Gultene Gurbuz ard ziwan ke seba ke îqtîdarê AKPyî bidê war do çîyo ke destê înan ra bêro bikerê û vat: “Ma sey cinîyan azadîye û edalet wazenê.  Ma do heqanê cinîyan bîgêrê. Ma do xoverdayîşî xurt bikerê û ser bikewê. Ma pê bawer ê AKP do şiro.” 

Merale Yildiz zî vat: “Paştîya ma Partîya Çep a Keske ra pêt a. Ma wazenê wa Dêrsim bibo bajarê cinîyan. Ma pê bawer ê ke namzeda ma Aytene Kordu problemanê cinîyan do bîyaro ziwan û têkoşînî xurtêr bikero.” 

Besîme Gok zî nê vatî: “Paştîya mi şarê Dêrsimî ra pêt a. Seba ke namzeda ma cinîya ma pê kêfweş ê. Cînîyî do zafêr bigurîyê. Ma sey cinîyan jîhat ê, cinîyî do bibedilnê, ma do bibedilnê.” 

Bîrsene Orhan zî vat: “ Wa rejîmê qesre hol bizano ke pê qefilnayîşê HDPyî nêeşkeno verê ma bîgêro. Ma sey cinîyan do paştî bidê namzeda xo. Ma akerdişê xo bi slogana Jin jiyan azadî kerd. Ma do slogana xo bikirişê meclîsî. Bawerîya azadîye ya xoverdayoxanê zîndanan do dêsan bivîyaro  û rejîmê qesre birijno.”