Qezaya Defne ya Hatayî de walîtî waşt ke cayê paştîdayîşî bi lez û bez bêrê hewaneyene. Halkevlerî vera nê waşt ke awanîya xo ver de eşkerayîye bido, polîsanê tirkan hêrîşê înan kerd û ê destbend kerdî.
Walîtîyê Hatayî waşt ke cayanê hetkarî û paştîdayîşan hewano, Qezaya Defne de roja erdlerzî ra dima Halkevlerî, Partîya Karkeran a Tirkîya û Yewîya Doktoranê Tirkan û xeylê sazgeh û sendîkayî seba ke mexdûran rê hetkarî û tedawî bikerê, Parka Sevgî de çadirî ronaybî. Walîtî waşt ke înan hewano.
Endamanê Halkevlerî derheqê na babete de Kuçeyê Konur ê Anqara de vat, ‘‘Wa tedbîran seba hewcedarîyanê bingeyînan ê şarî bigîrê, wa hetkarîyan rê astengî nêvejê’’ û waşt ke eşkerayîye bidê.
Polîsan hêrîşê înan kerd û Sereka Pêroyî ya Halkevlerî Nebîye Mertturk zî tede xeylê endamê Halkevlerî destbend kerdî.
