Federasyonê Elewîyan ê Demokratîkan (FEDA)  derheqê hêrîşanê dewleta tirke de ke herêmanê erdlerzî de kena, eşkerayîye weşaneye.

Eşkerayîya FEDA de nê çîyî ameyî vatene:

 ‘‘Şert û mercanê giranan ê zimistanî de bi mîlyonan şarê ma wêşanîya û şarê ma hemverê problemanê setargeh, xogermkerdiş û werdî de xover dano. Erdlerzî 12 rojî xo dima verdayî la hema zî nê problemî nêameyê çareserkerdene. Hetêkî ra erdlerzê ke dewam kenê, hetê bîn ra zî dewleta ke cuya ma nêpawena û hetkarîya şarê xo nêkena.

Bi taybetî sazgehê ma elewîyan ê Ewropa û Tirkîya, şarê kurd, HDP, hêzê çepgir û sosyalîstî, partîyê sîyasîyî û komelê sivîlî, rêxistinê sivîlî û kesê ke wayîrê wîjdan ê, hetkarîya şarê xo kenê. Cemxaneyê elewîyan sey merkezê felakete xebitênê. Nê cayan de hetkarîyî yenê arêdayene û şarî rê yenê vilakerdene. Cemxaneyî nê wextê çetînî de sey Xizirî resayê hewara mexdûranê erdlerzî.

Hêzê dewlete herinda ke sipasîya nê zerrîwaz û sazgehan bikerê, ê hetkarîyî ke ameyê arêdayene, înan rê benê asteng. Qeyûm erzenê sazgehanê hetkarîye û dest danê hetkarîyan ser o. Ma nê kerdişanê ferasetî yê Yezîtî lanet kenê.

Ma danê zanayene ke, ma şarê xo reyde yê û ma do hemverê nê ferasetê înkarkerî de zî xover bidê. Ma sazgehê elewîyan ê Ewropa û Tirkîya, ma do her şert û mercan de şarê xo reyde bibê. Ma do têkoşînê xo xurtêr bikerê.