Sîyasetmedarê kibrisijî û Wekîlê Kibrisî yê Parlamentoyê Ewropa Neoklis Sylikiotisî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Neoklis Sylikiotisî da zanayene ke ey 1980 de Almanya de PKK şinasnayo û vat: ''Birêz Abdullah Ocalan rîyê tewirê hukmatê Yunanîstanî ra tepişîya. Ma ê çaxî ra nata tewirê hukmatî rexne kenê. O çax zî mi vera hukmatî nêrazîbîyayîşê xo mojna. Ma sey Koma Çepe û AKELî tim azadîya Abdullah Ocalanî û kurdan viste rojdem. Abdullah Ocalan hucreyê yewkesî de mîyanê tecrîdî de tepişîyeno ke no nêno qebulkerdene. Hîrê serrî yo o nêeşkeno keye û avûkatanê xo bivîno. Tecrîdo winayên îşkence yo.

Abdullah Ocalan zîndan de zî têkoşînêkê bêhempayî keno. Heta ke no têkoşîn est bo tedayî çendek bibê zî çew nêeşkeno verê azadîya kurdan bigêro. Eqsê ci têkoşînê kurdan do pîlêr bibo. Ma Parlamentoyê Ewropa de zî tim paştî danê Şorişê Rojawanî. Şorişê Rojawanî pozîsyon û paradîgmaya Abdullah Ocalanî zî mojneno. Rojawan de xêrê têkoşînê PKKyî ra cuyêke ameye afernayene. Şorişê Rojawanî seba Kibrisî zî nimûneyêko tarîxî yo. No seba ma çimeyêkê îlhamî yo. Ganî sey şaranê Rojawanî şarê Kibrisî de cuyêka demokratîke awan bikerê.''

Neoklis Sylikiotisî derheqê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de vat: ''Dewleta tirke vatêne qey bi tepiştiş û tecrîdkerdişê Ocalanî têgêrayîşê kurdan do tasfîye bibîyêne. La wina nêbi û têgêrayîşê kurdan vila bi. Na Hemleya Azadîye seba çareserîya meseleya kurdan û azadîya Ocalanî zaf girîng a. Azadîya Abdullah Ocalanî seba herême zaf girîng a; çunke o eşkeno şerî vindarno.''

Neoklis Sylikiotisî peynîya qiseykerdişê xo de vat: ''Ma hertim hetê kurdan de yê. Ez paştî dana Hemleya Azadîye. Ganî ma şarê Kibrisî rê zî qala na hemle bikerê. Kitabê Abdullah Ocalanî ganî Kibris de hîna zaf est bê. Zaf girîng o ke şarê Kibrisî felsefeya Abdullah Ocalanî bişinasno û ma felsefeya Ocalanî Kibris de vila bikerê.''