Kongreya Demokratîke ya Şaran (HDK) 15ê teşrîna verêne ya 2011î de Anqara de ameye awankerdene. Ertugrul Kurkçu û Sebahate Tuncel bîyî hemvervatoxê ci yê verênî. Bingeyê HDKyî de Blokê Demokrasî, Azadîye û Kede esto ke hetê Têgêrayîşê Sîyasî yê Kurdan, partîyanê çepgîran ra sey alternatîfê vera bendê se ra 10î ronîyaye. Dima ke 35 wekîlî ameyî weçînayene têgêrayîşê kongre dest pêkerd. Partî, têgêrayîşê komelê sivîlî, temsîlkarê şaran, pawitoxê heqanê merdiman kom bîyî û Anqara de pê kongreya HDKyî gama destpêke ya seba têkoşînê hemparî eşte. HDK dima bi rayberê awanbîyayîşê partîya Demokratîke ya Şaran (HDP).

Mîyanê HDKyî de kurdî, şarê bindestî, nasnameyê etnîkî yê teberî, mezhebê cîyayî, cinîyî, endamê LGBTÎ, koçberî, têgêrayîşê xoza û kesayetê xoserî ca gênê.

HDKyî kongreya xo ya verêne 15ê teşrîna verêne ya 2011î ra dima no netîcename pare kerdbi:

''Seba qedînayîşê teda û neheqîye yê vera şaran, seba awankerdişê Tirkîyayêka haştîyane, seba awankerdişê îdareyê şaran HDK yeno awankerdene. Ma venga şaran, bindestan, terefgîranê xoza, keda, azadîye, têdûştîye, edalet û demokrasî danê ke seba têkoşînê hemparî xo rêxistin bikerê. Kongreya ma mîyanê şert û mercanê hêriş û tepiştişî yê dewlete û hukmatê AKPyî de kom bena. Warê têkoşînî yê hêzanê muxalefetê komelkî û demokratîkî, warê têkoşînê hemparî yê HDKyî yo. HDK seba çareserîya meseleya kurdan do pê metodanê demokrasî, haştî û têdûştîye têbigêrê.

Raameyîşê HDKyî wina yê: Partîya Demokrasî û Haştîye, Têgêrayîşê Azadî û Demokrasî, Partîya Karkeran a Sosyalîste, Partîye Kede, Partîya Demokrasî û Têdûştîye, Partîya Sosyalîste ya Bindestan, Partîya Sosyalîste ya Karkeran, Partîya Heq û Azadîye, Kaldiraç Koz, Têgêrayîşê Yewîya Sosyalîste, Platformê Paştdayîşê Sosyalîstî, Partîya Demokrasî ya Sosyalîste, Têgêrayîşê Partîye ya Ameyoxê Sosyalîstî, Platformê Azadîya Komelkî, Raştîya Tirkîya û Partîya Karkeran.

HDKyî mîyanê 10 serran de pê awanîya xo ya konfederatîfe pê rayîrê meclîsan torrêka rêxistiniye vete werte. Meclîs kede ra heta koçberîye, weşîya ra heta heqê perwerdeyî û bawerîyan û nasnameyê cînsî xeylêk waran de kar kerd, hema zî kar keno.