Herêmanê erdlerzî de çend şino rewşe giranêr bena. Semsûr û Dîlok de seba ke morgan de ca nêmend û ambulansî kêm ê, cenazayî kuçeyan de yenê pawitene. Hetê bînî ra mexdûrê erdlerzî vêşan û têşan, serdê zimistanî de tewber de yê.
Goreyê eşkerayîya selahîyetdaranê dewleta tirke hûmara kesanê ke wird erdlerzanê Bazarcix û Elbîstanê Mereşî de dinyaya xo bedilnaye, bîye 9 hezar û 57.
Herêmanê erdlerzî de çend şino rewşe giranêr bena. Ne semedê xelisnayîşê kesanê ke binê rijnayîşî de yê xebata ke hewce kena yena kerdene ne zî şaro ke serd û sipir de kuçeyan de yo, ci rê hetkarîye yena kerdene.
Şarê herêmanê erdlerzî rijnayîşan ser xelisnayîşê merdimanê xo paweno. Hemwelatîyî hetêkî ra semedê hetkarîye gazî kenê, hetê bînî ra lawikan erzenê heskerdeyanê xo ser û bermenê. Hetê bînî ra zî vera şertanê zehmetan ê zimistanî bi îmkananê xo xover danê. Şar vera dewlete hêrsebîyaye yo kam ke fekê xo akeno, vano dewlete ça de ya?
Dîlok de şarê ke bi îmkananê xo xeymê pînekerdeyî nayî ro, têkoşînê payramendişê kenê…
Semsûr de nêweşxaneyê bajarî felç bîyo. Serwîsê lezabezî nêşuxulyeno. Seba ke morg de ca nêmendo cenazayî erdî de yê…
Nurdagê Dîlokî yo ke nîmeyê ci rijîyayo senî ke tede şero gird bîyo, aseno. Seba ke ambulansî kêm ê, cenazayî kuçeyan de yenê pawitene…
Armutluyê Hatayî de seba ke hîrê rojî yo hema hetkarîya xeyman nêbîya şar bazar de maneno…
