Parlamenterê HDPyî yê Riha Omer Ocalanî ANFyî rê qisey kerd û dîyar kerd ke, hema zî dewanê Elbîstan ra kêmanîyî est ê û wina vat, ‘‘Ez qezayanê Elbîstan û Bazarcixî yê Mereşî de 5 rojî menda. Qezayêkê ez şîya, uca de zaf kesan koç kerdbî. Elbîstan bibî bajarê xeyaletan. Merkezê ci ra xeylê însanî merdbî. Xirbî hema zî cayê xo de bîyî. Elbîstan de kampanyayê partîya ma û sey KESK yê sendîkayan dewam kenê. Şar yeno depoyanê ma û goreyê hewcedarîyanê xo xo rê malzemayan gêno û hema zî çadirî zaf zaf kêmî bîyê.

Kes nêresaybi dewanê koyîyan

Ma di rojî pêser şîyê ê dewanê koyîyan. Çi heyf ke hewcedarîyê înan nêameybî peydakerdene. Tay dewan rê zaf hetkarî şîyêne tayînan rê qet nêşîyêne. Bi taybetî zî dewanê kurdanê elewîyan rê qet hetkarî nêşîyêne. Ma nê tespît kerdî û goreyê hêzê xo hetkarî resnaye. Paştîdayîşê Kurdîstan û yê metropolanê Tirkîya rasta zî zaf baş o, xebatêka girde est bî. La hetê organîzasyonî ra hema zî kêmanîyê dewlete est ê. hema tay dewî est  ê ke AFAD yan zî sazgehêka bîne yê dewlete nêşîyê.

Konteynir û kîra

Meseleyêka winayêne zî est a; wexto ke keyeyêk dekewîyo konteynirêkî, destekê kîra apey yeno girewtene. Seke dewlete banêk tahsîs kerdo. Erdogan soz dabi ke ê do wayîranê keyeyan rê 5 hezar kîradayoxan rê zî 2 hezar tl hetkarî bikerê. La nê pereyî ameyê birnayene. Şar seba ê pereyan terseno dekewo konteyniran.

Talûkeyê bedilyayîşê demografya

Meletî, Semsûr, Elbistan, Mereş, Islâhiye, Nurdagi, Hatay û Antakya, talûkeyê nê bajaran ê bedilyayîşê demografya est o. Nê herêman ra hem elewîyê kurdî hem zî elewîyê erebî ciwîyenê û tay zî xirîstîyanî est ê. Xora serebûdanê Mereşî de ke vera kurdê elewîyan de qirkerdiş bî, xeylê şar koçê Ewropa kerdbî. Ê deman de pasaportî ameyêne vila kerdene. Heta nika zî vajîyeno ke sazgehanê dewlete ra tena nufus akerde û xeylê pasaportî yenê waştene. Şar bê çare, mecbûrê koçkerdişî beno. Gere vernî bêro girewtene û îmkanê mendişî bêrê peyda kerdene.

Gere dîaspora hetkarî bikero

Kesê ke Ewropa de ciwîyenê gere merdimanê xo nêancê xo het, gere hetkarîya înan a ekonomîke seba tîyayî bikerê. Eşkenê tîya de înan rê warê ciwîyayîşî awan bikerê. Nêke na herême, ameyoxî de vikûveng bena û no talûkeyê demografya yo. Seke hetê dewlete ra bingeyê ney virazîyeno, seke dewlete zî teşvîk kena ke şar şêro.

Wezîfeyê her kesî yo

Rasta zî nê banî senî virazîyayî? Merdim mat maneno. Awanîyê girdî est bî ke sey kaxizî rijîyaybî. Nika ra dima çîyo ke gere bêro kerdene; êdî vernîya rantê înşaatî bêro girewtene. Tîya de kar vîyeyê Wezaretê Derûver û Bajarwanî de yo la ney ra vêşêr zî gere ma sivîlî, sazgehê sivîlî, demokratî, akademîsyenî û çepgirî nê prosesî her tim taqîb bikerê. No wezîfeyê her kesî yo.’’