Heyetê Teqîbê Grevê Vêşanîye yê Marmara vizêr verê Zîndanê Cinîyan ê Bakirkoyî de eşkerayîyêke daye û roja 229. de bale ante grevê vêşanîye yê tepişteyan ser.

Hemsereka HDPyî ya Îstanbulî Elîfe Bulut, Wekîla HDPyî Zuleyha Gulum, Îdarekarê HDKyî, temsîlkarê xeylêk dezgehan û merdimê tepişteyan tewrê eşkerayîye bîyî.

Eşkerayîye de ame vatene ke seba wedarnayîşê tecrîdî û binpaykerdişanê heqanê merdiman gamêke nêerzîyaye. Eşkerayîye de wina ame vatene: ''Tecrîd îşkence yo û pêro huqûqan de sûcê merdimîye yo. Îqtîdar Abdullah Ocalanî û tepişteyanê bînan tecrîd keno û nêverdeno ê keye û avûkatanê xo bivînê. Pê janî tecrîd pêro zîndanan de zêdîya. Semedo ke neçare mendî tepişteyan dest pê grevê vêşanîye kerd. Ma venga îqtîdarî danê ke ganî tecrîd û binpaykerdişanê heqanê merdiman biqedîno.''

Avûkat Veysî Ekerî zî pare kerd ke pê janê Korona pêro zîndanan de tecrîd vila bîyo û venga selahîyetdaran da ke wa mesele çareser bikerê.