Afyon de vra 7 karkeranê kurdan, Anqara de vera keyeyêkê kurdî hêriş ame kerdene. Tewr peyên zî Konya de hêrişê nîjadperestî de keso bi nameyê Hakîm Dal kişîya.

Hemsereka Komeleya Heqanê Merdiman (ÎHD) Erene Keskîn ANFyî rê qisey kerd û pare kerd ke nê hêrişî polîtîk ê. Keskîne pare kerd ke Komîsyonê ÎHDyî yê vera Nîjadperestî û Cîyakerîye pêro hêrişanê nîjadperestan bi baldarî teqîb keno. Erene Keskîn da zanayene ke wextê peyênî de hêrişê vera kurdan zêdîyayîn û vat: ''Ma baş zanenê ke şîdet polîtîk o. Ziwanê şîdetî, cîyakerî û nîjadperestî yê dewlete nê hêrişan zêdînenê. Na cografya de kesê ke nê hêrişan kenê bêceza yenê verdayene.

Mehkeme û dozgerî hêrişanê nîjaperestan goreyê madeya 22. ya TCKyî nêercnenê, pê çimê edlîyî nêewnenê nê serebûtan û  no nêzdîbîyayîş hêrişan zêdîneno. Kişîyayîşê Denîze Poyraz zî netîceya nê ziwanê îqtîdarî bîye. Ma nê hêrişan de dosyayan teqîb kenê û xo resnenê keyeyan la keyeyî tersenê. Hêrişanê Konya, Anqara û Afyonî de pêro merdiman vat ke semedo ke ê kurd ê vera înan hêriş ame kerdene. La mîsal Afyon de dozgerî hetê nîjadperestîye yê serebûyî peygoş kerd.''

Keskîne peynîya qiseykerdişê xo de ard ziwan ke ganî hêrişanê winasênenan de serebût çarçewa nîjadperestîye de bêro ercnayene.