Wekîlê HDPyî yê Şirnexî Huseyîn Kaçmazî ANFyî rê qisey kerd û da zanayene ke meseleya tewr pîle ya Tirkîya tecrîd o. 

Kaçmazî grevê vêşanîye yê tepişteyan vist vîrî û ard ziwan ke waştişê tepişteyan meşrû yê. Kaçmazî vat: ''Pê tecrîd û qeyûman dewlete şina serê kurdan. Aqilo ke welat îdare keno wexto ke teng beno qedexeyan ano şarî ver. Vanê îtîfaqê cumhurî ho mîyanê krîzî de yo. La a raşte ê hê verê rijîyayîşî de yê. Îqtîdar çareserîya meseleya kurdan vindernaye. AKP-MHP pê teda wazenê îqtîdarê xo rê dewam bikerê. 

Wedaritişê tecrîdê Îmraliyî yeno manaya caardişê qanûnan ê neteweyî û mîyanneteweyîyan. Domdarnayîşê tecrîdê Îmraliyî hem pê Dewaya Kobanê hem zî pê dewaya qefilnayîşê partîye vejîyenê verê ma. HDP rixmê pêro teda û hêrişanê îqtîdarî çirey  teslîm nêbi. Blokê îqtîdarî yê Tirkîya blokê nîjadperestan o. Heta nika înan meseleya kurdan ser o qetî gamêke nêeşte. Semedo ke verê rayîrê hîrêyînî bêro girewtene Abdullah Ocalan yeno tecrîdkerdene. Birêz Abdullah Ocalanî seba çareserîya meseleya kurdan paradîgmayêka zelale eştbî werte.''

Kaçmazî peynîya qiseykerdişê xo de ard ziwan ke dewlete vera tepişteyanê grevê vêşanîye teda kena ke îradeyê înan bişikna. Kaçmazî venga komelî da ke derheqê mesele de hîsger bibo.