Endamê Konseya Rayberdişî ya KCKyî Mustafa Karasuyî programêkê taybetî yê Medya Haberî de rojem erjna. Erjnayîşanê Karasuyî tay nuqteyî wina yê:

''Îqtîdarî heme tedbîrê banlerzî nêgirewtî, hem badê banlerzî wezîfeyê xo nêard ca û şar mergî rê caverda û hem zî hêrişê kesanê ke hetkarî kenê kerd. Dewlete pîya bi dezgehanê xo rijîyaye. Sûcê xo dîyî, dî ke bîye sebebê çiyî. Zanê ke sebebê nê netîcayanê giranan ê bi xo yê. Xora pêro komel û dinya zî no dî.  Seba ke serê nê bigêrî dest pê hêrişan kerd. Erdogan vano heqê xo helal bikerê. Ti sûc kerdo gerek cezaya ci biancê. Nêşermîyeno vano 'ma nêeşkenê merdayn peyseR bîyarê.' Îqtîdarê to yew di kesî nê bi se hezaran kesî kişti. Êyê ke bîyî sebebê nê mergan, înan rê do çi bibo? Şarê ma gerek dewlete ra çîyêk mapawo, bi hêzê xo wayîrê yewbînan vejîyo. Yew qala komelî est a: Dest cayo ke kenano zano. Îdareyê herêmî zî bajarê xo dahîna hol nas kenê, coka dahîna hol eşkenê bigurîyê.

Wa pêro komelî bizano ke sebebê nê heme dejan çaresernêkerdişê meseleya kurdan o. Seba ke dişmenê kurdan ê vera xebatanê herêmî vejîyenê. No sîstem serê dişmenîya kurdan ameyo ronayene û bîyo sebebê merganê se hezaran kesan. Dişmenîya vera kurdan Tirkîya de her çîyî  axû kena. Verê averşîyayîşanê xelatan akena. Heta ke meselaya kurdan nêro çaresekerdene, nê mesleyê çareser nêbenê. Badê banlerzî reaksîyonê komelê Kurdîstanî muhîm bi. Netîceya têkoşînê ma de zanayîşo komelkî vejîya werte. Badê banlerzî şar vazda gazîya mexdûranê banlerzî. Xora şaranê Tirkîya zî hetkarî kerd. Cemxanayan zî zaf hetkarî kerde. Xora komelê elewîyan de komelbîyayîş est o. Reyna paştîdayîşê HDPyî rolêko muhîm kay kerd. Rêxistinanê komelê sîvîlî û têgêrayîşê cinîyan zî destê înan ra çi ame kerd.

Têgêrayîşê ma cade qerarê vindarnayîşê çalakîyanê leşkerayan girewt. Seba ke çalakîyî mere kerdene veng da. Xora vat eke hêriş bibo xo bipawê. No çîyêko muhîm bi. Ma wazenê ke şaranê Tirkîya reyde tirkîyêka hempar rone. Cuyeyêka hempar ronê. La xora dewleta tirke wazena kurdan çîn bikero. semedê qirkerdişê kurdan şer kena. Seserrî yo vera kurdan şer yeno kerdene. Kenê ke erdê kurdan veng bikerê. Nika zî wazenê mexdûranê erdlerzî welatanê ci ra bifînê dûrî. Elewîyan erdê ci ra raqilnenê. Gerek şarê ma waranê xo pê paştîdayîş yewbînan newe ra înşa bikero. Wayîrê herra xo bivejîyo.

Komelê Tirkîya îqtîdarê AKP-MHPyî ra eciz bîyo. îtîfaqê Mîletî serrêk a xebitîyeno. No îtîfaq tim qala heq û huqûqî keno la xora ÎYÎ Partî sey leteyê MHPyî ya. Derdê ÎYÎ Partî demokrasî û azadîye nîyo, têna wazena dewlete ra par bîgêro. Îtîfaqê Kede û Azadîye zaf muhîm o. Tirkîya de motorê têkoşînê demokrasîyî yo. Têna hêzê îtîfaqê Kede û Azadîye eşkeno demokrasî û azadîye bîyaro Tirkîya. Na zî yew raştîya ke vera îqtîdarê AKP-MHPyî têkoşîno tewr pîl ma da. Têgêrayîşê Azadîye yê Kurdan da, hêzanê demokrasîyî da. Eke ewro îqtîdarê AKP-MHPyî têşîyeno, nêeşkeno payra bimano no xeyrê têkoşînê Têgêrayîşê Azadî ye Kurdan ra yo. Kurdî do nê dewrî de semedê wardayîşê îqtîdarî û ardişê demokrasîyî berpirsîyarîya xo bîyarê ca. Eke hêzê demokrasîyî pîya têbigêrê do Erdogan qetî şiro. Têkoşînê şarê kurdî do peynîya Vîjnayîşan bewlî bikero.

Ez kesê ke hêrişanê Şingalî de şehîd bîyî bihurmet yad kena. Berpirsîyaro tewr pîl ê nê hêrişan PDK yo. PDK hêrişanê dewleta tirke meşrû keno, îstîxbarat dano ci. Gerek no wina bêro zanayene. Verê fermanê 74ine PDK uca îdare kerdêne. Gama ke DAÎŞ ame rema û êzidîyî qirkerdişî dir rî bi rî verdayî. PKKyijî vazdayî gazîya êzidîyan. Hem korîdor akerd û hem zî vera çeteyan şer kerd û ê eştî teber. Naye ser o êzidîyî binê tesîrê fîkrê Rayber Apoyî de mendî û a çarçewe de waşt xo îdare bikerê. Raşt o gerîlayan paştî dayê înan la dima xo peyser ant. Nika uca êzidîyî goreyê fîkranê Rayber Apoyî têgêrenê. PKK roja ronayîşê xo ra wayîrê êzidiyan vejîyeno. PDK seba ke êzidîyî Rayberîye ra hes kenê, dişmenîya înan keno. Xoserîya Şingalî zirar dana kamî? Gerek heme hêzê demokrasîyî wayîrê êzidîyan ê Şingalî bivejîyê.''