Mûrat Kayataşî dîyar kerd ke ê biqerar ê ke vernîya astengîyan bigîrê  û vat, ‘‘Birîne birîna ma ya, dej dejê ma yo.’’

 Vervatoxê Buroyê Paştîdayîşî yê DBPyî yê Anqara Mûrat Kayataşî ANFyî rê qisey kerd. Kayataşî ard ziwan ke, ame vînayene ke dewlete seba erdlerzî hazir nêbîye, xebatêka bikoordînasyone nêameye kerdene, ekîbê xelisnayîşî ke teber ra ameyî, înan rê bîyê asteng û wina dewam kerd, ‘‘Çi heyf ke xeylê mexdûrîyetî virazîyaye û xeylê însanan dinyaya xo bedilnaye. Bi hezaran însanî zî serdan ver merdî. Roja 3ine ya erdlerzî de ma bi tîmêka 16 kesan Anqara ra şîyê Semsûrî. Ma beşdarê karanê xo yê merkezî yê koordînasyonî bîyê. Ma xebatê gêrayîş û xelisnayîş, hazirkerdişê werd û batanîye û setargehî kerdî. Çi heyf ke wexto ke ma Semsûr de bîyê, xeylê hetkarîyî ke teber ra ameyê, ameyê astengkerdene.

 ‘Ma do astengîyan hewanê û paştîdayîşî xurtêr bikerê’

Kayataşî dîyar kerd ke tayînkerdişê qeyûmî yê Cemxaneyê Hasankocayî nîşaneyê zîhnîyetê îqtîdarî yo û vat, ‘‘Nêzdîbîyayîşêko winayên est o ke şar, rêxistinanê şar û îradeyê şarî nêşinasneno û şarê xo ra bi nêzdîbîyayîşê xulamtîye ewnîyeno. Ma biqerar ê ke, ma do nêverdê ê bibê asteng û tora paştîdayîşî ma do xurtêr bikerê. Birîne birîna ma ya, dej dejê ma yo. Bêguman çi destê ma ra bêro, ma do bikerê û birînanê xo bipêşê.’’