Hemserekîya Konseya Rayberdişî ya KCKyî bi eşkerayîyêke şehîdê Qirkerdişê Mereşî, Qirkerdişê Parisî yê 23yê Kanûne û Xoverdayîşê Zîndanan ê 19ê Kanûne yad kerdî. Eşkerayîye wina ya:

''Ma kewtê serrgêranê Qirkerdişê Mereşî yê 19-24ê Kanûne, Qirkerdişê Zîndanan ê 19ê Kanûna 2000î û Qirkerdişê Parisî yê 23yê Kanûna 2023yî. Nameyê Têgêrayîşê Azadîye yê Kurdîstanî ser o şexsê nê şehîdanê kanûne de ma pêro şehîdanê demokrasî û şorişî bi rêzî yad kena. Ma nê qirkerdişanê dewleta tirke şermezar kenê. Sere de şarê kurdî şarê bînî, elewîyî, bawerîyê bînî, sosyalîstî, hêzê demokrasîyî bi hawayêkê sîstematîkî raştê qirkerdişan ameyî. Nê qirkerdişî raştîya dewleta tirke eşkera kenê.

Qirkerdişê Mereşî zî ê qirkerdişan ra yew o ke raştîya dewleta tirke eşkera kerda. Qirkerdişê Mereşî parçeyêkê Planê Şark-Islahatî û polîtîkaya qirkerdişê kurdan o. Bi nê qirkerdişî ame waştene ke herêma rojawanê Kurdîstanî yanî rojawanê Firatî kurdan û elewîyan ra bêra xalîkerdene û qirkerdişê kurdan bêro resnayene herêmanê Kurdîstanî yê bînan. Coka Qirkerdişê Mereşî safhayêka qirkerdişanê dewleta tirke yê vera kurdan a.  Qirkerdişo ke kiştiş û koçberkerdişê şarê kurdî-elewîyan dîyabî destpêkerdene nêqedîya û dewam keno. Hetê bînî ra Qirkerdişê Mereşî heman wextî de seba ke verê têgêrayîşê azadîye rojawanê Kurdîstanî de bêro girewtene ame kerdene.

20ê kanûna 2023yî de Qirkerdişê Parisî yo Diyîn ame kerdene. Nê qirkerdişî de şorişgêra pîle û Endama Konseya Rayberdişî ya KJKyî embaza ma Evîne Goyî, hunermend Mîr Perwer û welatperwer Abdurrahman Kizil ameyî qetilkerdene. Sey Qirkerdişê Parisî yê Yewinî dewleta tirke no qirkerdiş zî bi sereyê xo nêkerd. Dewleta tirke se serrî yo qirkerdişê kurdan û pêro qirkerdişanê bînan bi destekê NATOyî kena. Hêrişê ke Ewropa de ameyî kerdene bi destekê NATO û Gladyoyî ameyî kerdene. Na raştî eşkera ya û hetê şarê ma û her kesî ra zanîyena. Dewleta Fransa bi roşnînêkerdişê nê qirkerdişan verguman a. Ganî dewleta Fransa nimitişê raştîyan ra fek vera bida. Sere de Fransa heta ke dewletê Ewropa qirkerdişanê Parisî roşnî nêkerê do nêeşkê xo vergumanîye ra bixelisnê. Şarê ma qerardar o ke vera qirkerdişan têkoşîn bikero û eşkera bikero.

Hêrişanê namerdan û barbaran ra yew zî 19ê kanûna 2000î de vera tepişteyanê şorişgêran ame kerdene. Nê qirkerdişî de ancî mojna ke dewleta tirke qetî merdimatîye ra bara xo nêgirewta. Nê dewrî de zî îqtîdarê AKP-MHPyî raştîya nê qirkerdişî temsîl keno. Sere de tecrîdê vera Rayber Apoyî zîndanî binê tecrîd û îşkenceyî de yê. Tepişteyî vera nê kerdişan xo ver danê û çalakîyan kenê. Çalakîya grevê vêşanîye ya tepişteyan zîndanan de dewam kena û ganî na çalakîye hetê merdimanê teberî ra hol bêra famkerdene. Na çalakîye seba azadîya Rayber Apoyî û çareserîya meseleya kurdan dîyaye destpêkerdene. Ganî bi xurtkerdişê na çalakîye cewab bêro dayene tepişteyan. Teyna bi nê hawayî ma eşkenê paştî bidê tepişteyan. Ganî her kes na raştîye bivîno û tewirê xo bimojno. Seba mojnayîşê tewirê raştî ma vengdayîşêkê winayênî kenê.''