Bado ke Garîbe Gezer Zîndanê Kandira de bi hewayêkê şikdarî dinyaya xo bedilnaye, sîstemê tecrîdî yo xidar reyna ame çiman verfînayene.

Garîbe Gezera hewt mengî verî surgunê Zîndanê Kandira bîye û a roje ra nata bi caardişanê keyfîyan raştê îşkenceyî ameye. Hemsereka Komelaya Heqanê Merdiman (ÎHD) Erene Keskîn bado ke îşkenceyî ra hayîdar bîye cade şîye vekalete Gezere girewt û pêhesnayîşê sûcî kerd. Keskîne derheqê babete de ANFyî rê qisey kerd.

Keskîne ard ziwan ke aye mengêke verî Gezere reyde pêvînayîş kerd û vat: ''Verê mi de qerardar qardîyan rê waştişê xo ardêne ziwan û nêrazîbîyayîşê xo ramojnayêne. Garîbe heqê xo zaf hole zanayêne û milê xo çewt nêkerdêne.  Keyeyê Garîbe sey xeylêk keyeyanê bînan ê kurdan zaf dejê pîlî dî. Birayêkê ci ame qetilkerdene, birayêkê ci hetê hêzanê dewleta tira ame pirodayene û felç bi, birayêkê ci yo bîn zîndan de yo. Gezer şertanê xidaran de ameyêne tepiştene. Sîstemê îzolasyonî yê zîndanî xora sîstemêkê îşkenceyî yo. Zîndanê tîpê îzolasyonî de yew zî semedê cezayanê dîsîplînî caya dahîna girane ya hucre esta. Garîbe uca mendêne û vera naye vejîyayêne. Timûtim îtîraz kerdêne. Tewr peynî de waya xo ra vato cezaya ci ya 20 rojan a hucre esta.  Nê cezaya dîsîplînî bîlasebeb yenê dayene.''

Keskîne vat:  ''Xokiştiş ya zî qetilkerdiş, mergê Garîbe ra îdareyê zîndanî berpirsîyar o. Qaçîko binê pawitişê dewlete de bî. Xokiştiş bo zî sebebê ci sîstemê îzolasyonî yo. Ma nika raporê otopsî pawenê. Ma do heta peynî teqîkarê ci bi. Semedê cenazaya ci wesayîtê cenaza zî nêameya dayene û polîsan waşt cinîyan  ke cenaza kiriştêne asteng bikerê. Ne ganîyan rê ne zî merdeyan rê hurmetê înan esto. Cayê ne kerdişan qet yew bawerî de çîn o. Reyna huqûqê zereyî û yê mîyanneteweyî zî yeno binpaykerdene.''

Keskîne ard ziwan ke aye pêvînayîşê peyênî de Garîbe Gezer û Aysel Tugluk pîya dîye û vat: ''Înan  di odayanê têkişte de pê caman ra selam da yewbînan. Çimanê înan ra eysayêne ke senî zerrî ra selam danê.  O ewnîyayîşê înan ez çirey xo vîra nêkena.''