Tepişteyo sîyasî Îrfan Kiliçî roja 3’ê Temmuze de, Zîndanê Kandira yê Tîpê F’yî yê Hûmara 2’yine de cuya xo vînî kerde. Sere de ame îdîakerdene ke Kiliço ke qezaya Bongilanî ya Çewlîgî rê qeydkerde yo seba protestokerdişê tecrîdî xo kişto. La goreyê keyeyê ê Kiliç bi hawayêkê xofdarî ameyo înfazkerdene.

Birayê Kiliçî yo ke Belçîka de ciwîyeno Sebahattîn Kiliçî vat nêdayîşê cenaze, nêkerdişê otopsî û mergê ê ra di rojî dima dayîşê xebere bi keyeyî gumanê înan kerdê zêde.

 Delîlî Wedartî

Sabahattîn Kiliço ke ANF’yî rê qisey kerd vat, “Înan heme delîlî wedartî, hayîdarî nêdaye.”

Kiliçî vat, “Sere de înfaz kerd, di rojî ra dima xebere daye bi keyeyî, no bi sebebê gumanî. Sere de înan cenaze zî nêramote, dima ra tena seba ke bêro teşhîskerdene qismê çeneyî ra cor ame ramotene. Raporê otopsî nêda, tena raoprê definkerdişî da.

Kiliçî wina dewam kerd: “Keyeyê ma bêhîsdar nêmend, pîyê mi gama ke cenaze şite, veng da embazanê xo û vat no înfaz o. Wucûdê ê de şikitişî, şopê derbî estbî, binê çeneyê ê bi cisimêkê birnayoxî amebi qulekerdene. No înfazêko eşkera yo. Vêşayîşî qismêkê linganê ê ra heta cayêk estbî. Înan susê çalakîya ke bi vêşnayîşî ameya kerdene dayo ci. Îrfanî bi sereyê xo qerarê çetinî nêgirewtêne.”

“Ganî Ma Tepişteyanê Sîyasîyan Bipawê”

Kiliçî vat “Ma sey keye, şar û merdim dimayê nê vera nêdanê. Ma hemverê nê de bêhîsdar nemanenê. Cehdê ma yo nikayên seba ke sewbîna Îrfanî nêbê yo. Eke ma tê nêgêrê, bêhîsdar bimanê do hîna giranê nê virazîyê. Nika Îrfan merd, ma nêeşkenê ê pey ser bîyarê, la qe nêbo ma embazanê bînan ê ke zîndan de yê bipawê. No hêrişêk o ke hemverê ma heminan de ameyo kerdene. Ma do dimayê nê vera nêdê. Qetilkerdişê canêk, bi hawayêkê hende bêrehmî, ganî no înan rê nêmano, meşte do Îrfanî bibê zêde.”