Bi organîzasyonê Federasyonê Elewîyanê Demokratîkan (FEDA) şaristanê Kolnî yê Almanya de seba paştdayîşê bi CanTVyî şewêke ameye serûberkerdene.

Şewe de Hemsereka FEDA Hurîye Kabayel şewe de bale ante girîngîya paştdayîşî ser. Mudirê Pêroyî yê Can TVyî Zeynep Gulî zî qala tesîranê erdlerzê 6ê Sibate kerd û vat: ''Elewîyan nê erdlerzî de mojna ke ê rêxistinkerde yê. Ma sey Can TVyî tim xîret kerd ke bibê vengê elewîyan. Ewro CanTV bîyo arşîvê elewîyan.''

Şewe de hunermend Alî Dogan Gonultaş vejîya sehne ser. Gonultaşî ra dima Hemserekê Konfederasyonê Yewîya Elewîyan a Ewropa (AABK) Huseyîn Matî qisey kerd. Matî pare kerd ke weçînayîşê 14ê Gulane zaf girîng ê û vat: ''Nê weçînayîşî ma rê firsend ê. Ma terefgîrê haştîye, demokrasî, têdûştî û azadî yê. Seba ke ma nê weçînayîşan de unsuranê kanwazan ra bixelisê destê ma ra çi yeno do bikerê.''

Bername de Ayfere Duzdaş zî vejîyaye sehne ser û kilamî vatî. Duzdaşe ra dima Wekîlê HDPyî yê Dîlokî Mahmut Togrulî qisey kerd û vat: ''CanTV keno ke bawerî û kulturê ma yê qedîmî vila bikero û bipawo. Erdlerz ney la mezgê AKPyî yo pûyaye kişeno. 3 rojanê verênan ê erdlerzî de qet yew ekîpa xelisnayîşî nêameye. Ma hêrsbîyaye yê û qetî nê îqtîdarî ra do hesab bipersê.''