Parlamentoyê Ewropa de Konferansê Kurdan ê 17ine ame organîzekerdene. Konferanso ke 8 û 9ê adare de ame kerdene bi qebulkerdişê encamnameyî qedîya. Encamname de dîya zanayene ke konferans bi serkewtişî ame kerdene û nê ameyî vatene:

''Aşma sibate de Tirkîya û Kurdîstan û Sûrîye de banlerz bi. Xeylêk bajarî serûbin bîyî û bi des hezaran dinyaya xo bedilnaye. Têna banlerz nê polîtîkaya dewlete bîye sebebê mergê bi des hezaran. Ma kesê ke merdî yad kenê veng danê ke gerek Tirkîya  cade hêrişê vera Rojawanî vindarno ambargoyê serê hetkarîya merdimî abikero.

PKKyî riyê erdlerzî ra çalakîyê xo yê leşkerî vindarnayî. Gerek no adirbirnayîş bibo dihetin. No firsetêko muhîmo ke gerek bêro şuxulnayene.

Konferansê EUTCCyî veng dano ke wa muxalefet vera qedexeyê serê HDPyî têbigêro. Gerek komelê mîyanneteweyî û bitaybetî Yewîya Ewropa û Konseya Ewropa eşkera vajê ke qedexeyê serê HDPyî qebul nêkenê.

Gerek berê Zîndanê Îmraliyî bêrê akerdene. Ma veng danê Yewîya Ewropa, Konseya Ewropa û CPTyî ke wa heme mekanîzmayanê xo bişuxulnê ke avûkatî bieşkê şirê Îmrali.

Semedê çareserî gerek Abdullah Ocalan serbest bêro veradayene û mabênê dewleta tirke û PKKyî de newe ra dîyalog bêro destpêkerdene.

No dîyalog semedê ameyoxê Sûrîye û Rojhelatê Mîyanênî zî muhîm o. Gerek Îdareyo Xoser ê Rojawanî bêro naskerdene. Wa dewletî çeteyanê DAÎŞî yê tepişteyan peyser berê welatanê xo û muhakeme bikerê.  Reyna cayê ci de zî mehkemêye hewce kena.

Dewleta tirke Başûrê Kurdîstanî û Sûrîye de bi droneyanê çekdaran sere de cinîyî sîyasetmedaranê kurdan qetil kena. Gerek nê semedî ra bêro muhakemekerdene. Xeylêk dewletan hêrişê vera êzidîyan sey qirkerdiş name kerd. Gerek Yewîya Ewropa heme mekanîzmayanê dîplomatîk û polîtîkan bifîno dewre ke verê hêrişanê serê êzidîyan bêro girewtene.

Konferansê EUTCCyî veng dano ke wa Neteweyê Yewbîyayeyî, OPCW, Mehkemeya Ceza ya Mîyannewteweyî sûcanê şerî yê Tirkîya dir eleqedar bibê û cipersayîşanê xoseran bidê destpêkerdene. OPCW gerek îdîayanê şuxulnayîşê çekanê kîmyewîyan ê Tirkîya ser o vindero. Sere de Yewîya Ewropa, komelê mîyanneteweyî gerek şiro Tirkîya ser ke verê şuxulnayîşê çekanê kîmyewîyan bêro girewtene.

Yewîya Ewropa û Ewropa berpirsîyarê Pêkerdişê Lozanî yê. Konferansê EUTCCyî veng dano ke wa Yewîya Ewropa  û dezgehê Ewropa seba ke herra Ewropa de şerê vera kurdan nêro kerdene,  heme tedbîran bigêrê. Gerek Qirkerdişê Parisî bêrê safîkerdene. Gerek PKK lîsteya terorî bêro vetene ke verê çareserkerdişê meselaya kurdan bêro akerdene.

Pêro nê waştişî slogana Jin Jiyan Azadî de zî ca genê ke pê protestoyanê Îranî heme dinya de vila bîye.

Konferansê EUTCCyî paştî dano şaranê Îranî ke vera rejîmê zalimî serewedarit o.''