Parlamentoyê Ewropa de Konferansê Kurdan ê 17ine ame organîzekerdene. Konferanso ke her serre hetê Komîsyonê Hemwelatîyan ê Yewîya Ewropa-Tirkîya (EUTCC) ra organîzekerdene, emser bi sernameyê ''Yewîya Ewropa, Tirkîya, Rojhelatê Mîyanênî û Kurdî'' ame kerdene.

Konferansê ke vizêr dest pêkerd ewro roja diyîne û peyêne de verî roniştişê deheqê rewşa peyên a Rojawanî û hêrişê ke dewleta tirke pê çekanê kîmyewîyan û droneyan kena, gerîyayî dest. Roniştişê cemê şanî, binê sernameyê ''Yewîya Ewropa û Kurdî'' de ame kerdene.

Vervatoxa Tekîlîyanê Teberî Kongreya Neteweyî ya Kurdîstanî Nilufere Koç  çîyê ke kurdî Ewropa ra pawenê erjnayî. Koçe vîst vîrî ke Tirkîya goreyê krîteranê Ewropa û krîteranê endamîya NATOyî tênêgêrena û vat: ''Tirkîya kena ke erdê Sûrîye û Iraqî îşxal bikero. Tirkîya semedê welatanê ke cîranê ci yê tim probleman vejena. Komelê mîyanneteweyî semedê vera îşxalî çimanê xo geno. PKKyî çalakîyê xo  yê leşkerî vindarnayî.  Gerek no firseto tarîxî hol bêro şuxulnayene. Parlamentoyê Ewropa eşkeno rolo muhîm kay bikero. Gerek Komîsyonê Ewropa zî seba ke Tirkîya de vîjnayîşî bi hewayêkê edîlî bêrê kerdene xîret bikero. Rayberê Şarê Kurdî Abdullah Ocalanî ra di serrî xebere nînî girewtene. Gerek cade heyetêko xoser ê hekîman şiro.''

Mahmut Şakar zî qedexeyê vera PKKyî erjna. Şakarî vat: ''Seba ke PKK lîsteya terorî de yo no tesîrê heme kurdan keno. Rîyê nê lîste ra bi des hezaran kurdî mexdûr ê. Rixmo ke PKK tim semedê çareserî veng dano lîste ra nîno vetene. Tirkîya heme hêrişanê ke vera kurdan kena bi na lîste sey meşrû ramojnena. Qederê 40 mîlyon kurdan însafê Tirkîya rê mendo.''