Hemvervatoxê Komîsyonê Weçînayîşî yê Îstanbulî yê Partîya Çep a Keske Ramazan Yavuzî xebatanê weçînayîşan ser o ANFyî rê qisey kerd.

Wina pawîyeno ke weçînayîşan de Îstanbul de 31 hezar û 864 sindoqî bêrê donayene. Partîya Çep a Keske wina plan kena ke 70 hezar muşahîdan bişawa nê sindoqan û her dibistane de di kesan wezîfedar bikera. Partîya Çep a Keske seba Îstanbulî 50 wesayîtê anonsî amade kerdî.

Ramazan Yavuzî îfade kerd ke înan serrêke û nêm ra nata şarî rê qala partîya xo kerdêne û şarî hînî partîye şinasnaye. Yavuzî şar hişyar kerd ke pusulaya rayan de logo û nameyê HDPyî ney ê Partîya Çep a Keske do est bê.

Yavuzî vist vîrî ke amadekarîyê înan ê Îstanbulî dewam kenê û ê do her sindoqe de asayîşî bîyarê ca. Yavuzî bale ante hêrişanê vera buroyanê weçînayîşî ser û vat: ''Ma wina fikirîyenê ke buroyanê xo pê kamerayan teqîb bikerê. Ma kenê ke 150 buroyan Îstanbul de abikerê.''

Yavuzî dîyar kerd ke heta nika akerdişê buroyanê înan sey mîtîngî qewimîyayê. Yavuzî bale ante ser ke ê wazenê Meydanê Yenîkapiyî yê Îstanbulî de mîtîngêkê pîlî virazê. Reyna ma wazenê mîtîngê cinîyan virazê. Îstanbul şaristanê Kurdîstanî yo tewr pîl o. Coka ma armanc kenê ke Îstanbul de 20 wekîlîyan bivisnê destî û rayanê xo se ra se bizêdînê. Ma sey Partîya Çep a Keske amade yê.''