Parlamentera HDPyî ya Mûşî Gulîstane Koçyîgît dîyar kerd ke bi erdlerzî ame vînayene ke hukmatê AKP-MHPyî, her hetî ra dişmenê şarî yo û vat, ‘‘Ma do hetêkî ra birînanê xo bipêşê, hetê bînî ra zî ma do hesab bipersê.’’
Parlamentera Partîya Demokratîke ya Şaran (HDP) ya Mûşî Gulîstane Koçyîgît da zanayene ke erdlerzî ra 3 hewteyî vîyartî la hema zî şar teber ra yo, awe pake çin a û problemê hîjyenî dewam kenê.
Koçyîgît ANFyî rê behsê herêma erdlerzî kerd û vat, ‘‘Hetêkî ra felaketa erdlerzî hetê bînî ra zî felaketa AKP-MHPyî est a. Erdlerzî ra 22 rojî vîyartî la hema çadire, awe, ceyran û pakîye, sey nînan hewcedarîyê bingeyînî nêameyê safîkerdene. Şar bi zor xo binê xirban ra vet la 22 rojî yê ke teber ra yê.’’
‘Îqtîdar dişmenê şarî yo’
Gulîstan Koçyîgît ard ziwan ke, herêma erdlerzî ra talûkeyê janî est o û wina dewam kerd, ‘‘Xeylê herêman ra nêweşxaneyî rijîyayê û îmkanê tedawîbîyayîşêkê başî nêdekewenê destê şarî. 22 rojî yê ke hema meyîtî binê xirban de yê. 22 rojî yê ke hema çadirî nêameyê vilakerdene û gênê çadiran roşenê. Ma tim vatêne, no îqtîdar dişmenê şarî yo û bi nê erdlerzî no çî reyna ame vînayene. Bi nêweşxaneyanê bajarî pesnê xo dayêne la tewr verê ê rîjîyayê. Ma do hetêkî ra birînanê xo bipêşê, hetê bînî ra zî ma do pîya hesab bipersê.’’
