Tirkîya de multecîyî hedefê cîyakerî û hêrişanê nîjadperestîye de yê. Serra 2017î de Serekîya Îdareyê Koçkerdişî ya Wezîrîya Karanê Zereyî bire dabî ke sûrîyeyîjî zereyê Tirkîya de ancax bieşkê bi 'destûrê rayîrî' seyahatî bikerê. La Erdlerzê Mereşî yê 6ê Sibate ra dima wextê nê destûrî de ame kerdene 60 rojan. Multecîyê sûrîyeyîjî Mehmet Şehyarî derheqê nê kerdişê dewleta tirke de ANFyî rê qisey kerd.

Şehyaro ke 2009 de Helebî ra ameyo Tirkîya, wextêk Îstanbul de xebitîyayo û şerê zereyî yê Sûrîye ra dima 2011 de zî keyeyê xo ardo Tirkîya. Şehyarî keyeyê xo ardo Hatay û domanê xo zî mekteban rê qeyd kerdo. La cuya ey bira 'destûrê rayîrî' ra dima bîye zehmet.

Şehyarî vat: ''No ma rê seke bîyo ferman. Ez seba tedawî şîya Îstanbulî la seba ney zî mi destûr girewt.Wextê erdlerzî de ez Hatay de bîya. Cinî û domananê mi rê zerarêk nêresa la banê ma xesar dîyo. Erdlerzî ra dima ez agêraya Hatay û seba ke ma şorê hetê dadîya mi Afyonî mi destûr girewt. Uca de ma 30 rojan mendî la dima neçare mendî ke abigêrê Hatayî. Çunke Afyon de karêk mi nêdî. Nika zî na meseleya destûrî ra ez nêeşkena abigêra Îstanbulî.''

Şehyarî rexne kerd ke herêma erdlerzî de sûrîyeyîjan rê cîyakerîye yena kerdene û vat: ''Ez sey sûrîyeyîjî dadîya xo ra bîya. La qey no sûcê min o? Ez kincan derzena. Seba karî ganî ez şora Îstanbulî la destûr nêdanê mi. Ma xeyme de senî biciwîyê? Domanê mi bêdibistan mendî. Ma rê konteynir lazim o la ez hêvî kena a mesele de zî ma cîyakerîye nêvînê. Ma hem multecî hem zî mexdûrê erdlerzî yê. Erdler şerî ra xirabêr o. Sey sûrîyeyîjan, qey heqê ma çin o ke ma biciwîyê? Ez wazena ke no kerdişo cîyaker cade bêro wedaritene.''