Serekê Pêroyî yê Partîya Îslamî ya Kurdîstanî (PÎK) Hikmet Serbilindî dîyar kerd ke stratejîya Îtîfaqê Cumhurî çinbîyayîşê kurdan ser o ameyo awankerdene û bi beşdarîya HUDA-PARî zî kayêko newe yeno awankerdene.
Serekê Pêroyî yê PÎKî Hikmet Serbilindî derheqê weçînayîşan de ANFyî rê qisey kerd.
Serbilindî pare kerd ke Îtîfaqê Cumhurî estbîyayîşê xo înkar û îmhaya kurdan ser o nayo ro û vat: ''Îtîfaqê Cumhurî do her ca de hêrişê kurdan bikero. Ganî ma ney hol bizanê û weçînayîşan de goreyê ney qerar bidê. Ganî bi Îtîfaqê Kurdîstanî bêro hîrakerdene. Yewîye û hemkarîya kurdan weçînayîşan de girîng ê.''
Sebilindî bale ante îtîfaqê AKP-MHP û HUDA-PARî ser û vat: ''Nê hêzan 90an de hêrişê kurdan û Kurdîstanî kerdêne. Teyna Hîzbullah ney pêro partî û hereketê îslamîyî hetê dewlete ra vera PKKyî ameyî şuxilnayene. HUDA-PAR cara destpêkî ra nata seba AKPyî xebitîyayêne. Ez wazena şarê kurdî hişyar bikera. Weçînayîşan de wazenê mabênê HDP û Hîzbullah/HUDA-PARî de nakokîyan vejê. No planê hukmatî yo. Weçînayîşan de ê do tay kesan bikişê. Ganî şarê ma hişyar bibo û nêro provakasyonan. HUDA-PAR partîyêka îslamî zî nîya. Goreyê HUDA-PARî misilmanan ra ber sereyê her kesî ganî bêro birnayene. Dewlete peyê ney de ya. Ganî ma baldar biba û kayê dewlete pûç bikera.''
