Partîya Çep a Hewze Anqara de otêlêke de Beyannameyê Vîjnayîşî eşkera kerd. Partîya Çep a Hewza ke sloganê ci yê  vîjnayîşî ''Ma tîya de yê, do pîya bibedilnê'' û ''Dîsa Em/ Reyna ma'' yê'' heyata aktîvîte de pankartê kirdaskî, kirdkî û tirkî daliqnayî û sloganê xo dayî eşnawitene.

Pîya bi Hemserekanê  Pêroyî yê Partîya Çep a Hewze Çîgdeme Kiliçgun Uçar û Îbrahîm Akinî, Hemserekê Pêroyî yê HDPyî Pervîne Buldan û Mîthat Sancar, Hemserekê Pêroyî yê KCDyî Berdan Ozturk, Vervatoxa HDKyî Esengule Demîr, Hemserekê Pêroyî yê DBPyî Salîha Aydeniz û Bayindir Keskin û îdarekarê ESP, SODAP, SYKP, TOP, EMEP, TÎP û xeylêk sîyasetmedarê kurd û temsîlkarê rêxistinanê komelê sîvîlî, roşnvîr, nuştox û rojnamegerî tewrê aktîvîte bîyî.

Aktîvîte semedê kesanê ke  erdlerzê 6ê sibate ya Mereşî de dinyaya xo bedilnaye, rêz ame girewtene û verî Hemserakanê Pêroyî yê HDPyî Pervîne Buldan û Mîthat Sancarî qisey kerd. Dimara deyîrê kurdkî û tirkî yê vîjnayîşî “Dîsa em/ Reyna ma” û “Buradayız / Ma tîya de yê” dîyayî naskerdene.

Nasdayîşî de mesajê Hemserekanê verênan ê HDPyî Fîgene Yuksekdag, Selahattin Demîrtaş, sîyasetmedarî Sebahate Tuncel, Ayla Akat Ata, Selçuk Mizrakli, Îdrîs Baluken, Gultene Kişanak û Gunay Kubîlayî yê ke zîndan de sey rehîn yenê tepiştene, ameyî wendene.

Hemserekanê Partîya Çep a Hewze Çîgdeme Kiliçgun Uçar û Îbrahîm Akini Beyannemeyê Vîjnayîşî yê partîye eşkera kerd.

Beyanname de sere de meseleya kurdan derheqê meseleyanê bingeyênan yê welatî de madayê çareserî ca genê. Beyanname çar beşe û 50 sernameyan ra yeno raameyene.

Beyanname de bale yena antene serê muhîmîya vîjnayîşî û yeno vatene ke sere  meseleya kurdan seba ke problemê tarîxî, komekî û sîyasîyî nêameyî çareserkerdene welat de zaf krîzê giranî est ê.

Beyanname de semedê komelê azad û seyyewbînî komara demokratîke yena nîşandayene û mesajê çareserkerdişê demokratîkî yê meseleya kurdan yeno dayene.

Beyanname de bale yena  muhîmîya sîstemê parlamenterî yo ke bi demokrasîya herêmî bêro xurtkerdene ser semedê çapemenîya azade, tepişteyanê nêweşan, cinîyan, kedkaran, ciwanan, astengdaran û macîran çareyî yenê rêzkerdene.