Kongreya Komelê Demokratîkî (KCD), Platfrmê Cinîyan ê Kurdan ê Yewbîyayeyan, Partîya Herêman ê Demokratîkan (DBP), Partîya Demokratîke ya Şaran (HDP), Komeleya Kurdan a Demokratîke-Şorişgêre (DDKD), Têgêrayîşê Azadîye, Partîya Komunîste ya Kurdîstanî (KKP), Partîya Azadîye ya Kurdîstanî  (PAK), Partîya Demokratîke ya Vakurê Kurdîstanî (PDK-BAKUR), Partîya Merdiman û Azadîye (PÎA), Partîya Sosyalîste ya Kurdîstanî (PSK),Partîya Demokrate ya Kurdîstanî ya Tirkîya (PDKT) û Têgêrayîşo Demokratîk ê Kurdîstanî (TDK-TEVGER), derheqê rewşa badê erdlerzî de eşkerayîye daye.

Heme hemserekê partî û têgêrayîşan tewrê eşkerayîye bîyî. Eşkerayîye tirkî hetê Hemsereka Pêroyî ya DBPyî Salîha Aydenîz ra û kurdkî hetê Serekê Pêroyî yê PAKî Mustafa Ozçelîkî ra ameye wendene. Eşkerayîye ra qismêk wina yo:

''Erdlerzê Mereşî  ke da 10 bajaran û bi seyan qezayan rê ke zafê înan Kurdîstan de yê. Erdlerzî tesîrê 13 mîlyon însanan kerd. Goreyê hûmaranê fermîyan 43 hezarî ra zafêr kesan dinyaya xo bedilnaye. 200 hezarî ra zafêr merdimê ma birîndar bîyî û bi se hezaran bînayî rijîyayî. Bêşik hûmara merdeyan, xesarê madî  û texrîbatê psîkolojîkî dahîna giran ê. Erdlerzî tesîrê Efrîn, Cinderes û Helebî zî kerd, 7 hezar kesan dinyaya xo bedilnaye û 15 hezarî ra zafêr kesî birîndar bîyî.

Şar mîyanê tengayîya pîle de yo û çi heyf ke hetkarîya ke  hewce kena zî nêresena nê herêman. Eşkera yo ke Tirkîya roja verêne ra semedê mexdûranê erdlerzî wezîfeyê xo nêard ca û  cehd kerd ke verê hetkarîya hetan bînan zî bîgêro. Hema xeylêk herêman de astengkerdişê winayên dewam kenê.

Tirkîya destûr nêda hetkarî bireso Efrîn, Cinderes û Helebî û no zî bi sebebê zafbîyayîşê mergan û mexdûrîyetî. Xora raya verêne nîya ke şarê Kurdîstanî raştê zextê winayênî dewleta tirke yeno. Îqtîdarê AKP-MHPyî bitaybetî badê 22ê temmuza 2015î  reyna agêra sîyasetê şerî. Sîyaset û şerê vera kurdan bi stratejîya newe 3 letayanê Kurdîstanî ra vila kerd. Netîceya na stratejî de erdlerz de merg û mexdûrîyet zafêr bîyî.

Rixmê heme astengkerdişê dewlete şar hêzê xo kerd yew û paştî daye mexdûranê erdlerzî. Îqtîdar keno rewşa erdlerzî zî goreyê menfeatê xo bişuxulno. Ganî heme xebat û tedbîrê ke semedê paştîdayîşê mexdûranê erdlerzî û newe ra înşakerdişê herêma erdlerzî yenê kerdene  goreyê menfeatê dewlete nê goreyê hewcedarîya şarî bêrê kerdene. Wa demokrafîya herême nêro bedilnayene. Seba ke şar erdê xo ra mevejîyo, ganî xebeta zaf hîra û bitesrî bêro organîzekerdene. Ganî şarê ma û heme hetê herêmî û mîyanneteweyî, dezgehî semedê mexdûranê erdlerzî bibê seferber. Ma veng danê heme dezgehanê mîyanneteweyî wa semedê  hetkarîya mexdûranê erdlerzî gamanê zixman bierzê.''