Hetkarîyî ke rojan ra dima yenê Mereş, bi hewayêko adîlane nêyenê vilakerdene. Seba dewanê elewîyan ne tîmê gêrayîş û xelisnayîşî û ne jî hetkarîyî yenê erşawitene.  Dewanê elewîyan ra  rijîyayîşê zaf girdî virazîyayî û dewijî qederê xo rê ameyê terkkerdene. Bi no hewa înan waşt ke şar mecbûrê koçkerdişî bibo. Pîrê elewîyan Alî Soysuren derheqê na babete de Ajansê Mezopotamyayî rê qisey kerd.

Nîyadayîşo bitalûke demê osmanîyan ra dewam keno 

Soysurenî vat: ''Demê osmanîyan ra heta nika na herême sey herêma bitalûke yena vînayene û gere bêra çinkerdene, yena nîyadayene. Înan qetîye qebul nêkerd ke kurdê elewî nê herêman ra biciwîyê. Hewl dayî ke, bi raya zilmî nasname, bawerî û komelkîbîyayîşê na herême çin bikerê. Elewî hemverê ê planî de vindertê ke waştêne sunîtîye vila bikerê û demografyaya herême bibedilnê. Serebûdanê 1978î yê Mereşî de, kesê ke halê înan ê ekonomîkî xirab bî, înan ra vatêne ke ‘dikananê elewîyan talan bikerê, keyeyê înan keyeyê şima yo.’ Bi no hewa înan elewîyî talan kerdî û qir kerdî. Eynî zîhnîyetî nika çimê xo verdayo mal û dewanê elewîyan.''

Têna dezgehêko xebityeno: Pasaport

Sarisorenî ard ziwan ke degehê dewlete yê herême xizmetê şarî nêkenê û vat: ''Têna karê pasaportî yeno kerdene ke şar erdê xo caverdo. Dewlete badê erdlerzî qala cigêrayîş û xelisnayîşî nêkerd. Cade qala rijnayîş û newe ra înşakerdişî kerde. Ma zanê ke ê wazenê bajarî goreyê zîhnîyetê xo înşa bikerê. Kenê ke na herême de zî sey Sûrî bînayanê bêruhan virazê. Dimayê erdlerzî polîtîkaya koçkerdişî bi hewayêkê lezî yena rayraberdene. Seba ke şarî bêçare biverdê û erdê ci ra raqilnê, heme metodan şuxulnenê. Sey Elbîstanî xeylêk dewanê elewîyan rê xizmet nêşeno. Eke rêxistinanê elewîyan, HDP, HDK, ciwanan û çepgiranê tirkan roja verêne ra tîya dest pê xebatê nêkerdêne, hewcedarîyê şarî do merasayênê înan.''

Ma eşkenê reyna wirzê payan ser

 Soysurnî bale ante muhîmîya paştîdayîş û yewbîyyaîşî ser û vat: ''Ma dewlete ra zafêr bê, ma dahîna zaf xebityayî. Ma hetkarî resnayê dewanê elewî û sunîyan. Metropolan de merdim ruhê xo vînî keno. Ganî ma tîya her hetî ra bajarê xo newe ra înşa bikerê. Seba ke nika dejê ma est o, ma bêçare yê çew ferq nêkeno la hêz merdiman de yo. Bi yewbîyayîş çew eşkeno reyna wirzo payan ser. Pê komelkîbîyayîşî ma eşkenê meridimîye ya ke erdlerz de merde, newe ra ganî bikerê. Ganî şar tîya ra meremo, bibo yew û wayîrê herra xo  bivejîyo.

Şaro ke tengayî de yo semedê hetkarî yeno Cemxaneyan. Rêxistinê elewîyan ê ke nêzdîye dewlete yê paştî nêdanê komel û hewcedarîyanê komelî û êyê ke çar hetanê Kurdîstan û Tirkîya ra semedê paştîdayîşî ameyî, peyê xo kenê înan. Ma nê prosesî de wazenê ke rêxistinanê elewîyan nêzdîbîyayîşanê winayên ra bixelisnê.''