Nuştoxo başûrê kurdîstanij Behzad Pîrmusayo ke paytextê Swêdî Stockholm de ciwîyeno edebîyat û kulturê kurdan ser o nuseno. Pîrmûsa hêrişê îşxalî yê dewleta tirke yê vera Behdînanî zî nêzdî ra teqîb keno. Pîrmusa derheqê babete de ANFyî rê qisey kerd.

Behzad Pîrmusayî îfade kerd ke dewleta tirke armanc kena ke Başûrî bi temamî îşxal bikera coka pê bahaneya gerîlayan hêriş kena. Pîrmusayî vist vîrî ke hêrişê vera Başûrî referandumê xoserîye yê 2017î ra nata yenê kerdene û vat: '' No Başûrî ra mesajêk o. Xora Zaxoyî ra heta Başîka dewleta tirke xeylêk herêmê Başûrî îşxal kerdê. Hêrişê vera Garê, Zap, Avaşîn û Metîna zî parçeyê nê îşxalî yê.''

Behzad Pîrmusayî bale ante alozîya Zînî Wertê ser û ard ziwan ke  o çax PDKyî xîret kerd ke sey serra 1992î atmosferêk biaferno, partîyanê sîyasîyan û rayaumûmîye seba şerêkê pîlî yê vera gerîlayan îqna bikero la nêeşka. Pîrmusayî vat:

''Beşêkê PDKyî bi xurtî paştî dano hêrişanê îşxalî. Ma zanenê ke tay beşê PDKyî cayê gerîlayan îxbar kenê, agahîyanê îstîxbaratî danê artêşa tirke û seba tasfîyeya gerîlayan dewleta tirke reyde hemkarîye kenê. Ganî PDK hînî îşxalkeran rê hetkarîye mekero û vera dewleta tirke tewirê xo bimojno. Eke Behdînan bin bikewo PDK zî keweno. Ganî PDK na raştîye bizano û goreyê ci têbigêro.''

Pîrmusayî da zanayene ke nêrazîbîyayîşê vera îşxalî Başûr de zêdîyeno û vat: ''Hînî wekîlê PDKyî zî vera nê hêrişan nêrazîbîyayîşê xo mojnenê. Eke hêrsê şarê Başûrî û xoverdayîşê gerîlayan bibê yew îşxalî do bêrê binkerdene.''