Eşkerayîya Komîteya Têkilîyanê Teberî ya PKKyî wina ya:

 ‘‘Nê çend rojî yê ke tay wezîfedarê Swêdî, partî û têgêrayîşê ma tay çîyanê nerastan rê sûçdar kenê ke Têgêrayîşê Azadîye yê Kurdîstanî krîmînalîze bikerê.

PKK, partîyêka sîyasî ya ke hewlê xelisnayîşê Kurdîstanî  û azadîya şarê kurdî de ya û nê warî de berdêlê zaf giranî dayî. Partîya ma, Têgêrayîşêk a ke girêdayîyê exlaq, wîjdan û demokratîkî ya. Partîya ma roja ke awan bîya (1978) û heta nika, 45 serrî o ke bi nê esasan sîyaset kena. Qet têkilîyê partîya ma bi kes û derûveranê krîmînalan rê çin a û vera ney şer kena.

Rastî na ya, dewleta tirke û derûverê xo yê hemkarî, seba ke partîya ma krîmînalîze bikerê, dek û dolabêk û zurêke nêmende ke kerde. No demêk o ke Sefîr Oscar Strenstrom zî nameyê Swêdî ser o qisey keno û beşdarê karwanê nê sûcdarkerdişanê nerastan beno. Birêz Strenstromî, qiseykerdişêkî de vat; tay kesê krîmînalî Swêd û Tirkîya de sûcanê xesp, çek û tîryakî kenê û partîya ma fînanse kenê û bi nameyê ‘Luyê kurdî’ biname kerd.

Çîyê ke Birêz Strenstromî vatî, rast nîyê, çîyêko winayên çin o. Seba ke zerrîya muxetebanê xo yê Tirkîya weş bikero înan reyde pêvînayîşan keno, nê çîyî xo het de vatî. ‘Luyê kurdî’ kam ê, ma nêzanê, nêşinasnenê, tu têkilîya ma înan reyde çin a. Tirkîya de nameyê PKKyî vatiş zî sûc o û cezayê zîndanî yenê birnayene. Xeylê însanî est ê ke derheqê PKKyî de qisey kerdo, nanêk dayo PKKyî ameyê sûcdarkerdene û ê kesî ameyê Swêd de bext wazenê. Goreyê îdîayê Strenstromî ‘Luyê kurdî’ seba ke sûcêk kerdo Swêd ra remayê Tirkîya û uca de bi serbestî gêrenê. Ser û binê nê vatişan çin o.

Demanê peyênan de seba endamtîya NATOyî, seba ke xo Tirkîya rê weş bikerê, wezîfedarê Swêdî sey Wezîrê Karanê Teberî Tobias Billstromî zî eşkerayîyêka winayêne daye. Ma nê sûcdarkerdişan rede kenê. Hukmatê Swêdî beno ke Tirkîya reyde têkilîyanê xo baş bikera la wa ma ser û kurdan ser o bazarîye nêkerê. Paştî medê Erdoganî ke welatê ma bi çekanê kîmyasalan bomba keno.

Dostîya kurdan û yê şarê Swêdijan rewna est a. Na dostîye seba ma muhîm û biqîmet a.  Ma wazenê na dostanî hîna zaf aver şêra. Şarê Swêdî êyê ke wayîrê wîjdan ê, zanê û vînenê ke nê sûcdarkerdişî seba çi yenê kerdene. Kam se vano wa vajo, ma do exleq, merdimîye û demokratîkî bipawê, ma do nê rayîrî ra rayîr şêrê ke ma ci ra bawer ê, û ma do welatê xo îşxalkeran ra bixelisnê û şarê xo azad bikerê.’’