19ê Kanûna 2000î de dewleta tirke binê nameyê 'Operasyonê Cuye rê Agêrayîşî' 30 tepişteyî qetil kerdbî. Qirkerdişê Zîndanan ê 19ê Kanûne şaristananê Vakurê Kurdîstanî û Tirkîya de ame şermezarkerdene.

Îstanbul de verê Zîndanê Umranîye de endamanê Komeleya Heqanê Merdiman (ÎHD) eşkerayîyêke wende. Hemsereka ÎHDyî ya Îstanbulî Gulserene Yolerî pare kerd ke qirkerdişî ra dima hesab nêame perskerdene û tepişteyê ke qirkerdişî ra xelisîyayê zî ameyî surgunkerdene û tecrîdkerdene. Gulserene bale ante grevê vêşanîye yê tepişteyan ser û vat: ''Wa cade tecrîd wedarîyo, zîndanê sey TÎPê F, S, Y û Bi Asayîşê Berzî wedarîyê, Heyetê Çimdarîye û Îdareyî wa wedarîyê, peynîya îşkence û kerdişanê xiraban bêra, tepişteyî bi hawayêkê edîlî wa muhakeme bibê û heqê înan bêrê caardene û tepişteyê nêweşî cade vera bidîyê.''

Amed de bi beşdarîya Hemsereka Pêroyî ya ÎHDyî Erene Keskîn û Wekîlê CHPyî Sezgîn Tanrikuluyî eşkerayîye ameye wendene. Eşkerayîye de ame waştene ke wa tecrîdê vera Rayberê Şarê Kurdî Abdullah Ocalanî bêro wedaritene. Hemsereke Erene Keskîn pare kerd ke a şahîda Qirkerdişê 19ê Kanûne ya û vat: ''Pêro selahîyetdarê ê çaxî sûcdar bîyî la nînan ra çewî zî hesab nêda.''

Îzmîr de serkêşîya ÎHD, OHD û ÇHDyî de verê Zîndanê Kiriklarî de qirkerdiş ame protestokerdene.

Wan de Komîsyonê Zîndanan ê ÎHDyî û Êlih de zî Parka Yilmaz Guneyî de Şubeyê ÎHDyî bi eşkerayîyan qirkerdiş protesto kerd.