Hetkarê Serekê Pêroyî yê Partîya Însanî û Azadî (PÎA) Ahmet Kayayî ANFyî rê qisey kerd û bale ante polîtîkayanê asîmîlasyonî ser o û vat, ‘‘Eşkenê polîtîkayêka winayêne bikerê ke Semsûr, Dîlok, Mereş û Meletî taybetmendîyê xo yê Kurdîstanî bidê vindîkerdene. Hemverê ney de gere bi hewayêko xurt bêro vindertene.’’

 ‘Dewlete çin a şar est o’

Kayayî vat, ‘‘Afetanê verênan de şar seba kêmanîya dewlete vatêne, ‘Dewlete kura de ya?’ la nika êdî şar fek na perse ra verdaya êdî şar vano ‘Dewlete çin a, şar est o’. Çimanê şarî de êdî dewlete çin a. Şar bi paştîdayîşanê xo birînanê yewbînan pêşeno. Dewlete tena şer, kiştiş û çinkerdişê azadîye de est a.’’

 ‘Paştîdayîşê komelkî, îqtîdarî tersna’

Ahmet Kayayî ard vîrardene ke cayanê ke gere dewlete est bîyêne, rêxistinê sivîlî, komelî, sendîkayî û partîyê sîyasîyî hîna rew resayê ê cayan û vat, ‘‘Nê çîyî îqtîdar tersna. Îttîfaqê Cûmhûrî aciz bî. Nê halî de kêmanîya dewlete, rêxistinê sivîlî bi organîzasyonê xozayî cayê ci pir kerd, coka îqtîdar zaf aciz bî. No hal, rastî û tiralîya îqtîdarî zî vete meydan.

Hetkarîyê HDPyî ameyê astengkerdene. Merdim nêeşkeno fam bikero. hetkarîyê rêxistinanê sivîlan ameyê astengkerdene. No, nîşaneyê tiralîya înan o. Dewlete bi serran hewl da ke rêxistinanê sivîlan, sîyasetê sivîlan vindî bikera la na felakete de sivîlî dewlete ra başêr biorganîze xebitîyayê.’’

 Ê firsendêk gêrenê

Kayayî da zanayene ke îqtîdarê AKP-MHPyî nê tewir serebûdan seba kerdişanê xo xebitnena û xo rê kena firsendêkî û vat, ‘‘Îlankerdişê Halê Îstîstayî zî nîşan dano. Verê naye 15ê temmuze de bi îlankerdişê Halê Îstîsnayî vengê muxalefete birnaybî û seba polîtîkayanê xo xebitnaybî. Ewro zî do tay planê înan est bibê. Eşkenê weçînayîşî taloq bikerê. Coka bajarê ke kurdî tede est ê, ê bajaran de destê ey ra çi bêro do bikero ke nê erdlerzî xo rê bikero firsendêkî. Eşkenê bikerê tehcîrêkê xozayî. beno ke şarê tîyayî rê ferz bikerê ke şar vera xo bido bajaranê rojawanî. Eşkenê polîtîkayêka winayêne bikerê ke Semsûr, Dîlok, Mereş û Meletî taybetmendîyê xo yê Kurdîstanî bidê vindîkerdene. Hemverê ney de gere bi hewayêko xurt bêro vindertene. Seba ke şarê ma waranê xo de bimano, gere ma bi heme îmkananê xo seferber bibê.’’