Platformê 12ê Adare bi wesîleya serrgêra Qirkerdişê Gazîyî yo ke 28 serî cuwa ver ame kerdene, verê Weqfê Kultur û Perwerdeyî yê Gazîyî (Cemxane) de ame têhet.

Partîya Sosyalîste ya Bindestan (ESP) zî  verê rêxistina Sultangazîyî ra heta cemxaneyî rayraşîyayîşêk kerd. Xeylêk endamê Kaldiraçî zî bi sloganan heta verê cemxaneyî rayra şîyî

Bi hezaran kesan verê xo da cayê qirkerdişî. Polsan dest na pankartanê ''dewleta qetilkare'' û ''dewlete mirnayî'' ser. Gama ke  nameyê bajaranê ke binê tesîrê erdlerzî de mendî ameyî wendene, slogana ''hukmat îstîfa'' bîye berze. Çalakwanan û merdimanê kesanê ke ameyî qetilkerdene Parka Huseyîn Altinî de vilîkî nayî ro.

Birayê Dîleke Şîmşeka ke ameye qetilkerdene, Erekan Şîmşekî vat: ''Kiştoxan waşt bi nê hêrişî şaran biverdê pê û pêkewtişê elewî-sunî biafirne. Şarê Gazî zaf hol zano kam no provokasyon kerd û waştişê ci çibi.  Hêrişkaran waşt ke muxalefetê Gazîyî bêro bêvengkerdene û verê şorişgêr û demokratan bêro girewtene. Rixmo ke kiştoxî eşkera bê, bi dewayanê sey kayî de ameyî muhakemekerdene û nêameyî cezakerdene.

Serekwezîra dewrî Tansu Çiler, Wezîre Karanê Zereyî Nahît Menteşe, Serekê Daîreyê Îstîxbaratî  Hanefî Avci, Mudirê Pêroyî yê Asayîşî Mehmet Agar, Walîyê Îstanbulî Hayrî Kozakçioglu, Mudirê Asayîşî yê Îstanbulî Necdet Menzir û kesanê ke înan ra talîmatê kiştişî girewtî, berpirsîyar ê gerek berê cezakerdene.''

Badê eşkerayîye çalakwanî heta Goristanê Gazîyî rayra şîyî, vilîkî nayî goran ser.