Seba mexdûranê erdlerzî, paştîdayîşê HDP, rêxistinanê sivîlan û yê zerrîwazan dewam keno. Mexdûrê erdlerzî bi hetkarîya şarê kurd û hetkarîya ke teberê welatî ra yena, hewl danê ke birînanê xo bipêşê. Serekê AKPyî Erdogan mexdûran tehtîd keno û reyna dest bi zuran keno.

Eşkere bî ke îdîayê îqtîdarê AKP-MHPyî yê seba hetkarîya mexdûranê erdlerzî pêro zur ê. erdlerzî ra 20 rojî vîyartê la hema zî mexdûrê erdlerzî tena yê. Tay zerrîwazî, bajaranê cîranan ra keyeyanê xo akerdî. Mexdûrî seba hetkarîyî muracatê sazgehan kerdî la destveng agêrayê.

Sozê ke dewlete dayê mexdûran pêro zur ê

Mexdûrêkê erdlerzî ke nêwaşt nameyê xo dîyar bikero, derheqê na babete de vat, ‘‘Merdimê min ê Wanijî roja 5ine ya erdlerzî de ameyê ez arda Wanî. Meletî de 5 rojî dewlete qet hetkarîya ma nêkerde. Ma 5 rojî têşan, vêşan û teber ra bîyê. Dima ma mecbûr mendê ke Meletî ra bivejîyê. Ma pêro hetê merdimanê xo de manenê. Seba ke ez hetkarîya erdlerzî bigîra ez şîya Walîtîya Wanî û xeylê sazgehanê dewlete. Tu kes hetkarîya mi nêkerde. Xebatkarêkî vat, ‘‘Na babete de qet fermanêk nêameyo ma rê’’ ez destveng agêraya. Nê 15 rojî yê ke ez tîya der a û qet hetkarîyêke nêgirewta.’’