Akerdişê buroyanê weçînitişî yê Partîya Çep a Keske bajar bi bajar, kuçe bi kuçe dewam kenê. Qezaya Sûrî ya Amedî de buroyê hîrêyinî ame akerdene. Namzedî Serhat Eren, Ceylane Akça, Songul Aytek, Cengîz Çandar û xeylêk kesî tewrê akerdişî bîyî. Verê akerdişî bi muzîkê weçînitişî govende ameye girewtene.

Qiseykerdişê akerdişî Hemserekê Pêroyî yê HDPyî yê Amedî Zeyyat Ceylanî kerd. Ceylanî vat: “ Ma do çirey talankerdişê Sûrî, ganê ma yê ke ameyî qetilkerdene xo vîr a mekerê. Ma do cuye, xoverdayîş û têkoşînê Sûrî tim bidê ciwîyayene.”  

Gama Ceylanî qisey kerdêne polîsan tehdît kerd, naye ser o şarî bi slogana  “Bijî berxwedana Sûr’e” cewab da.  Ceylanî vat: “ Şima nêeşeknê vengê ma bibirnê, ma do vengê şima bibirnê. Tîya şeş serrî xoverdayîş ame rayra berdene. Nameye nê Sûr o, kurd ê. Çew nêeşkenê verê nê bîgêro.  14ê gulane roja hesabpersayîşê ya.’’

Namzed Serhat Erenî zî vat: “Êyê ke wazenê ma biqedînê ma do înan biqedînê. 14ê gulane roja hesabpersayîşî ya. Înanê ke keye, dewê ma, Sûr rijna ma do înan ra hesab bipersê.”  Seba ke Erenî vat: “Gerek Birêz Ocalan rolê xo kay bikero” polîsan mudaxale kerd. Naye ser o şarî slogana  “Bijî Serok Apo” eşte. Erenî vat: “ Şima vengê ma bibirnê zî nêeşkenê heqîqetî tarî bikerê. Ma do pîya bi şarê xo ser bikewê.”

Badê qiseykerdişan bi tewrbîyayîşê Dayîkanê Haştîye buro ame akerdene. Akerdiş bi tîlîlî, çepik  û govende  ame kerdene. Namzedan dima ra vilawekî vila kerdî.