Raporî de ame îfade kerdene ke heta roja 26 sibate erdlerzî de 44 hezar û 374 kesan dinyaya xo bedilnaya û 164 hezar û 321 awanîyan hesaro giran girewto û gere bi lez û bez bêrê rijnayene.

‘Afeto xozayî bî felakete’

Raporî de ame vatene ke herêmanê erdlerzî ra zaf bajar û qezayan ra sîstemê bingeyînî ê bajarî qut biyê, nêweşxane, xetê enerjîyî, rayîr û lîmanê teyarayan zî xesar girewt û nêame xebitnayene. Yanî no afetêko xozayî bî felaketêka girde. 

Dewamê raporî de nê çîyî ameyê vatene:

‘‘Şaredara Dîlok Fatma Şahîn erderzî ra çend saetî dima beşdarê programêkê Youtubeyî bîye û bi vatişanê aye yê ‘‘Nêmeyê Islahîye rijîya, vindî bîye’’ ma eşkenê fam bikerê ke girdîya erdlerzî ê hûmaran ra zafêr a. Verê erdlerzî hende pisporî seba tedbîrgirewtişî bi hezaran rey îqaz kerdo la qezîfedaran peygoş kerd û erdlerzî ra dima zî şaşîyê cîdîyê ke ameyê kerdene, bêkoordînasyonîye û îhmalkerîye bîyê sebebê na felakete.’’

Îhlalkerdişê heqan

Raporî de îhlalkerdişê heqan bi kilmkî wina yê:

-Herêma erdlerzî ra zîndanî de bi mudaxelayê hêzê asayîşan 3 tepîşteyî merdê, 9 hebî zî birîndar bîyê

-Nezaretxaneyî de rîyê îşkence û mûamelayê xirabî ra kesêk merd.

-Tewr kêmî 2 kesî marûzê lînçî mendê

-9 tewir serebûdan de 17 kesî marûzê îşkence û mûameleyê xirabî mendî. Kesêkî dinyaya xo bedilnaye. Tewr kêmî 10 kesî birîndar bîyê.

-Herêma erdlerzî ra domananê ke wayîrê înan çin o, 1902 kesî bîyê nînan ra nasnameyê 1820 kesan dîyar bîyo, nasnameyê 82 domanan zî dîyar nêbîyo.

-Herêma erdlerzî ra rojanamegeranê ke taqîbê xeberan kerdêne, 11 hebî hetê polîsan ra 11 hebî zî hetê sivîlan ra marûzê mudaxeleyî mendê. Tewr kêmî rojnamegerêk birîndar bî, 4 rojnamegerî ameyê destbendkerdene. Û sewbîna rojnamegerêkê xerîbî rê zî destûr nêame dayene ke sînorî ra bivîro

-Seba parekerdişanê medyaya sosyale 2 rojnamegerî ameyê tepîştene.

-Seba parekerdişanê medyaya sosyale 141 kesî ameyê destbendkerdene, 27 kesî tepîşîyayê.

- Halk TV û Tele 1 rê Fox TV cezayê pere û girewtişê programî ameyê dayene

-Seba ke erdlerzî ra dima unîversîteyî ameyê girewtene, şaro ke ney protesto bikero rastê mudaxeleyê xirab ê polîsan ameyê.

-Hetkarîyê zerrîwaz, şaredar û yê rêxistinanê sivîlan tewr kêmî 29 rey ame astengkerdene. Terw kêmî kesêk marûzî şîdetê fîzîkî ame û tewr kêmî kesêkî rê cezaya pereyî ameye birnayene.

Hêrîşê biçeke yê vera faalîyetê hetkarîye de kesêk birîndar bî.

100 tirî ke hetê Partîya Geleceke ra erşawîyayî û 1500 çadirî, 8 tirî û 2 kamyonî, 30 konteynirî û 120 jenaratorî ke hetê HDPyî ra erşawîyayê, ameyê destserkerdene.