Wekîlê HDPyî yê Wanî Sezaî Temellîyî ANFyî rê rojdem ercna.

Temellîyî vat: ''Çîyê ke qewimîyayî  ramojnenê ke Îtîfaqê Mîletî de tim derûrorê krîzêkî de gêrayo. Xora ameyêne zanayene ke ê pêsere nêkenê. Krîzê 2ê adare ke goreyê sîyasetî nêbî, gerek têna sey muneqeşeyê namzedî nêro destgirewtene. Hema çîyê ke rayrapêroyî rê nêameyî eşkerakerdene est ê. Gerek nê qewimîyayîşî bêrê îzahkerdene.

Tirkîya raşta zî 20 serrî vînî kerdî. Nê demî de mexdurîyetê girdî qewimîyayî ke zafê înan şarê kurdî rê bîyî. Şer, şîdet û dejê pîlî tim barê kurdan bî. HDP tim ame sûcdarkerdene, hemserekê ma yê verênî zî tede xeylêk wekîlê ma zîndan de yê. Xeylêk embazê ma zî ameyî surgunkerdene.

Krîzê 2ê adare de reyna ame vînayene ke mesele pê HDPyî çareser bena. Goreyê mi Akşener gama ke agêraye mîyanê îtîfaqî hinda ajandayê ci de vervejîyayîşê çareserkerdişê meseleya kurdan û muzakerayanê bi HDPyî çînêbi. Çunke şar vera ÎYÎ Partî vejîya. Coka ewro ra tepîya no îtîfaq hinda nêeşkeno peyê xo bikero HDPyî. Raşta zî ÎYÎ Partî roja ronayîşê xo ra vera HDPyî tewir girewt. Ma no xo vîra nêkerd.

Tirkîya dewleta huqûqî ya. Gerek nê neheqîye ke qewimîyenê bêrê qedînayene. Semedê demokratîkbîyayîşî Tirkîya gerek muzakereyî bêrê kerdene. Ma verê erdlerzî namzedê xo yê serekkomarîye eşkerakerdêne. Seba ke erdlerz de dejê girdî qewimîyayî ma na mesela caverda verê xo herêmanê erdlerzî. Cayo ke dewlete tede çînêbî, ma kerd ke paştî bidê şarî.

Ma do prosesî newe ra birecnê. Beno ke ma namzed vejê, yan zî paştî bidê namzedê hêzanê demokrasîyî. Eke namzadê Îtîfaqê Mîletî bieşko bibo namzedê hêzanê demokrasîyî, o wext beno ke ma paştî bidê ci.  Eke wina mebo ma zî bi namzedêkî rayîrê xo dewam kenê ke pawitişê hêzanê demokrasîyî, şaranê Tirkîya û şarê kurdî rê eşkeno bibo cewab.

Tewr hole HDP û hêzê demokrasîyî yê ke vera faşîzmî têkoşîn kenê, dewlete şinasnenê. Dewlete statuyo ke bi xo afirnayo pawena. Ge yew statt de, kuçe de, ge-ge zî qiseykerdişê grûbeke de pê heme îmkanenê xo kena nê bipawe. Eşkera yo ke pê têkoşînê komelê rêxistinkerdeyî nêeşekena nê bidomno. Wextê vîjnayîşî de beno ke wakayê winayên biqewimîyê la hinda semedê her kesî dayo çala qirrike, îqtîdarî rê tehamul nêmendo. Şar zaf hêvîdar o ke bi têkoşînê hemparî eşkeno nê zîhnîyetî ra xo bixelisno.

Xora gureyê ma rehet nîyo. Bedilnayîşê nê sîstemî zehmet o. Heta ke no çerx bigurîyo, zilm, feqîrîye, vêşanîye, şer û  merg est o.  Hêzê demokrasîyî gerek cewabo ke hewce keno nê prosesê vîjnayîşî de bidê. Ez nê zî cade vejî; muzakere û paştîdayîşê ke wextê vîjnayîşî de benê gerek badê vîjnayîşî zî dewam bikerê. Eke têna bi atmosferê vîjnayîşî sînordar bimanê hewa nêbedilyeno. No zî Tirkîya û Rojhelatê Mîyanênî de do ver problamanê girdan abikero.''