Weçînayîşê 14ê gulane benê nêzdîyêr. Zîndanan de zî tewr tay 42 hezar tepişteyî est ê ke eşkenê raya xo bidê. Tepişteyî do bieşkê bi rayîrê sindoqanê zîndanan raya xo bidê. Hetê bînî ra asayîşê sindoqanê zîndanan zî girîng o. Goreyê doneyanê Wezîrîya Edaletî nika zîndanan de 42 hezar û 522 tepişteyî û 298 hezar û 975 mehkumî est ê.

Madeya 67. ya Qanûnê Bingeyî vana ke ''Mehkumî nêeşkenê raya xo bidê.'' La tepişteyê ke adresê înan zîndanan de qeydkerde yê, bi rayîrê sindoqanê zîndanan eşkenê raya xo bidê. Seba ke zîndanan de sindoqî bêrê ronayene, hetê YSKyî ra memurê sindoqan yenê erkdarkerdene. La seba ke HDP nameyê xo ser o nêkeweno weçînayîşan û Partîya Çep a Keske Meclîs de canêgêno, do nêeşko sindoqan de cabigêro.

Hemvervatoxê Komîsyonê Zîndanan ê OHDyî Vedat Eceyî girîngîya asayîşê sindoqan ANFyî rê ercnaye. Eceyî vat: ''Seba ke asayîşê sindoqanê zîndanan zaf muhîm o. Ganî erkdarê partîyanê sîyasîyan û memûrê sindoqan erkê xo goreyê lazimîye bîyarê ca. Girîng o ke weçîbayîşan ra dima zabitnameyo peyên û sindoqê rayan teslîmê heyetanê weçînayîşî yê qezayan bêrê kerdene.''