Erdlerzê Mereşî de 11 bajarî tesîrê erdlerzî de mendbî û bi des hezaran însanan zî dinyaya xo bedilnaybî û bi hezaran însanî zî mecbûr mendî ke  koçê bajaranê bînan bikerê. Nika hişê şarî de persêke peyda bîya, gelo înanê ke koç bajaranê bînan kerdo, ê do bieşkîyê weçînişî de rey bifînê yan ney.

Rêxistina HDPyî ya Îstanbulî seba ke mexdûrê erdlerzî bieşkîyê rey bifînê komîsyonêk awan kerd. No komîsyon seba ke kesê ke koçê Herêma Marmara kerdî, bieşkîyê weçînitişî de rey bifînê, bixebitîyo.

Halê Întîsnayî de weçînitişêk

Endamê Meclîsê Partî yê HDPyî Cengîz Topbaşliyî ard ziwan ke weçînişî de bi mîlyonan însanan ke reya înan est a, do nêeşkîyê şêrê rey bifînê. Herêmanê erdlerzî ra Halo Îstîsna est o û dîyar nîyo ke do çend biremo. Îhtîmal est o ke wextê weçînitişî de nê însanan berê herêmanê erdlerzî.

Topbaşi dîyar kerd ke mexdûrê ke muracatê HDPyî kenê, sey karê yewinî qeydê înan AFAD û qeymeqamtîya qeza de virazenê ke qeydê înan vindî nêbo. Dima eke kamcîn keyeyêkî manenê, uca de qeydê înan yeno viraştene.

Wesfê înan ê weçînitoxîye nêşîyo

Parlamenterê HDPyî Mehmet Ruştu Tîryakîyî ANFyî qisey kerd û ard ziwan ke HDP roja verêne ya erdlerzî ra yo ke goreyê erdlerzî reyna planêke viraşte û karê xo zî reyna goreyê erdlerzî reyna plan kerdî. Tîryakî ard ziwan ke îqtîdar herinda ke mexdûranê erdlerzî rê hetkarî bikero, înan tena verdano û bi se hezaran însanan zî koçê bajaranê bînan kerdo û vat, ‘‘Nika seba her kesî bîyo persêk, gelo ê kesê ke koçê bajaranê bînan kerdo, û êyê ke cayê nêterknayê do senî reya xo bifînê. Na babete de ez verê wazena ney vaja; Nê însanî ke şîyê bajaranê bînan yan zî hem herême de yê, wesfê înan ê weçînitoxîye nêşîyo.’’

Di rayîrî ê însanan ver o est ê; yew, bajaro ê şîyî, qeydê xo uca de bivirazê. Bi no hewa cayo ke şîyê, uca de eşkenê reya xo bifînê. Yê dîyinî zî, adresê xo nêberê ê bajarî ke ê şîyê û wextê weçînitişî de şêrê herêma xo reya xo bifînê.

Hewdayîşê seba vengkerdişê herême

Tîryakîyî bi taybetî bale ante hewldayîşê vengkerdişê herême ke ê wazenê nufusê kurd û elewîyan kêmî bikerê û vat, ‘‘Bi taybetî herêma kurd û elewîyî tede ciwîyenê, polîtîkayê teşwîqê yê koçkerdişî est ê ke şar waranê xo terk bikero. Bi kampanyaya ‘Keyeyo Dost’ ê partîya ma û bi paştîdayîşê şarê ma ma eşkenê vera ney bivinderê.’’