Wekîla HDPyî ya Amedî Remzîye Tosun xoverdayîşê 14ê Temmuze û grevê vêşanîye yê tepişteyan Jinnewsî rê ercnayî. 

Tosune ard ziwan ke kurdî bi serran o vera zulmî xo vee danê û vat: ''Serebûtê ke 14ê Temmuze de û dima ci qewimîyayê hema zî vîrê kurdan de yê. Mazlûm Doganî Newroza 1982î de bedenê xo da adirî ver û mojna ke o do teslîm nêbo. Sere de Mazlûm Dogan ez pêro embazanê ke grevê vêşanîye de şehîd bîyî yad kena. Xoverdayîşê înan rayîrê ma roşnî keno. 

Ewro hema zî zîndanan de hîşmendîya Esat Oktayî ya 12ê Êlule dewam kena û xoverdayîşê vera teda zî roje bi roje zêdîyeno. Grevê vêşanîye tim bi metodê xoverdayîşî. Nika zîndanan de bi hezaran embazê ma vera  tecrîd û binpaykerdişê heqanê xo grevê vêşanîye de yê. Grevê vêşanîye do pê ruhê 14ê Temmuze îşkence û zulmî bin bikero.''

Remzîye Tosun da zanayene ke bingeyê pêro meseleyanê welatî de îqtîdaro tekperest esto û vat: ''No îqtîdar kurdan rê bêçaretîye ferz keno. La kurdî têkoşînê azadîye kenê û vanê 'Çareserîye mumkîn a.' Birêz Ocalanî vatbi ke 'Ez eşkena na mesele hewteyêk de çareser bikera.' Coka ganî Birêz Ocalan sey muxatab bêro qebulkerdene û o bêro azadkerdene.''

Remzîye Tosun peynîya qiseykerdişê xo de venga her kesî da ke têkoşîn pîlêr bikero.