Xeylêk cayanê Vakurê Kurdîstanî û Tirkîya de vera zeman nêrazîbîyayîşî û çalakîyî zêdîyenê. Vizêr reyna xeylêk cayan de çalakîyê şermezarkerdişî ameyî kerdene û îstîfaya Erdoganî ameye waştene.

Qezaya Qoserî ya Mêrdînî de bi des hezaran merdiman pê slogananê ''DEDAŞ îstîfa'', ''biciwîyo haştî'', ''Tayyîp Îstîfa'' zemî protesto kerdî. Girse vera Dîcle Elektrîk (DEDAŞ) de ççalakîya rayraşîyayîşî kerde. Rixmê astengkerdişê polîsan zî girseyî nêrazîbîyayîşê xo mojna û trafîk girewt. Kuçeyê nêweşxaneyî de polîsan hêrişê girseyî kerd û waşt girse vila bikerê. La girseyî çalakîya xo rê dewam kerd û pê kerrayan cewab da hêrişê polîsan. Çalakîye de xeylêk kesî zî ameyî destbendkerdene.

Çalakîye ra dima dormeyê bînaya DEDAŞî û taxanê dormeyê ci de polîsê hêzê taybetî û wesayîtê zirxînî ameyî cakerdene. Rojnamegerî zî herême ra ameyî dûrvistene.

Qezaya Şemrexî ya Mêrdinî de zî hemwelatîyê ke vera zemê ceyranî vejîyayî kuçeyan faturayê xo vêşnayî.

Qezaya Farqînî ya Amedî de verê bînaya PTTyî de merdiman DEDAŞ protetso kerd û ver bi bînaya ci ya Farqînî şi. Şar tîya de eşkerayîye daye. Hemwelatîyê bi nameyê Seyîthan Aktarliyî uca de vat: ''Zulmê DEDAŞî esto. Şar perîşan bîyo. Şar nêeşkeno faturayan bido.''

Dîlok de zî şar vera zeman kuçeyan de bi. Çalakîye de ame waştene ke wa zemî peyser bêrê antene.

Îzmîr û Antalya de zî şarî rayberîya Hêzanê Demokrasî û Kede de pê findan û lambayanê gazî zemî protesto kerdî. Çalakîyanê wird şaristanan de ame vatene ke şar rîyê polîtîkayanê îqtîdarî ra vera beno feqîr la terefgîrê îqtîdarî zî vera benê zengîn. Girseyî faturayê ceyranî vêşnayî û waşt ke zemî apey bêrê girewtene.